Елбасы сапарында қол жеткізілген келісімдер қағаз жүзінде қалмауы тиіс - Премьер-Министр
«Мемлекет басшысының шетелдік сапарлары барысында бизнес-форумдар, өтіп, көптеген келісімдер, меморандумдарға қол қоямыз. Ал одан кейін мониторингтің қалай жүргізілетіндігін де білмеймін. Яғни, олар қағаз күйінде қалып қоймай, соңына дейін жеткізуіміз керек қой. Сондықтан бұл жұмыстарға екі министрлік тарапынан тексеру жүргізілу қажет. Олар: Инвестициялар және даму министрлігі мен Сыртқы істер министрлігі. Жыл соңына дейін бұл жұмыстарды аяқтау қажет», - деді Сағынтаев.
Осы ретте Үкімет басшысы жыл соңында жеке жиын өткізіп, бизнес-форумдар барысында рәсімделетін келісімдердің қаншалықты тиімді екендігі сараланатындығын баса айтты.
Өз кезегінде Сыртқы істер министрлігі Ерлан Ыдырысов үкіметаралық комиссиялар мен іскерлік кеңестеріне қатысты мәселе көтерді.
«Бізде 115 үкіметаралық комиссия мен 24 іскерлік кеңес бар. Әрине, барлығы да жұмыс істеп жатыр. Бірақ, өкінішке орай жұмыс кездесуден кездесуге дейін ғана жүргізілуде. Біз сізге хат жаздық. Сіз арнайы тапсырма бердіңіз. Қазіргі уақытта біз үкіметаралық комиссия жұмысын бағалау критерийлері бойынша ұсыныс енгіздік», - деді министр.
«Сізбен толықтай келісемін. Кей жағдайда біздің үкіметаралық комиссияны құрметті министрлер басқарады. Үкіметаралық комиссия басшысының өзі жұмыстың мәнін біле бермейді. Өйткені, оған жауап беретін жұмыс органы және басқа да органдар бар. Менікі жалпы үйлестіру, Экономика министрлігі мынаған, Инвестициялар және даму министрлігі анаған жауап береді, дейді. Яғни, мұндай болмауы тиіс. Осы елге, осы үкіметаралық комиссияға жауап беретін болса, онда барлық бағыттарда сұрау аталған комиссияға жауапты министрден болуы қажет», - деді Сағынтаев.