Елбасы Жолдауы Батыс Қазақстан облысында кеңінен насихатталуда
Облыс орталығы мен аудандарда құрылған үгіт-насихат топтары мүшелері тұрғындармен кездесіп, Жолдауда айтылған негізгі бағыттарды түсіндіруде. Бұл іске құқық қорғау органдарының өкілдері де атсалысуда. Айталық, Ақжайық ауданының прокуроры Абзал Ғилым Жайық сол жағалауындағы Есенсай, Қарауылтөбе, Базартөбе, Базаршолан округтерінде болып, тұрғындармен жүздесті. Кездесулерде Елбасы Жолдауы туралы жан-жақты әңгіме қозғалып, ауыл-аймақтың әлеуметтік-экономикалық жағдайы, полиция инспекторының қылмыстың алдын алуға байланысты қам-қарекеті, мал ұрлығы, браконьерлікпен күрес, маскүнемдік сынды өткір мәселелерге дейін көтерілді. Азаматтардың конституциялық, еңбек құқығын қорғау, кәсіпкерлерді қолдау, жасырылған және тіркелмеген қылмыстарды анықтау жайы да сөз болды.
Елбасы Жолдауына байланысты үгіт-насихат жұмыстары барлық ауданда жүргізілуде.