Елдегі 25,5 мың ғалымның 54 пайызы — 40 жастан асқандар

АСТАНА. KAZINFORM — Ғылым және жоғары білім министрі Саясат Нұрбек Үкімет отырысында елдегі ғалымдардың жас құрамы туралы дерек келтірді.

— Еліміздің ғылыми әлеуеті — 25,5 мың ғалым, оның 46%-ы 40 жасқа дейінгі мамандар. Ғылым саласында 425 ұйым жұмыс істейді. Енді гранттық конкурстар жыл сайын өткізіледі. Бұрын 3 жылда бір өткізілетін, — деді ол.

Оның айтуына қарағанда жыл сайын ғылымды мемлекет есебінен қолдау тетіктері кеңейтіліп келеді. 

— Постдокторанттар мен жас ғалымдарға гранттар, әзірлемелерді коммерцияландыруды қаржыландыру, іргелі институттарды тікелей қаржыландыру, шетелдік тағылымдамалар және мега-гранттар енгізілді. Қазіргі уақытта 264 ғылыми-техникалық бағдарлама, 2 361 ғылыми жоба (оның 835-і жас ғалымдарға тиесілі) және 208 коммерцияландыру жобасы қаржыландырылуда. 1 475 ғалым шетелде ғылыми тағылымдамадан өтті, — деді министр.

Айта кету керек, өткен аптада «Болашақ» және «Ғылыми тағылымдамалар» стипендиясына құжат қабылдау басталғанын жазған едік.