Елдегі энергияның 20 %-ын беріп отыр: мұржасынан ақау шыққан Екібастұз электр стансасы туралы не білеміз

ПАВЛОДАР. KAZINFORM — «Болат Нұржанов атындағы Екібастұз 1-МАЭС» ЖШС Екібастұз қаласынан 16 шақырым жерде орналасқан. Жобалық белгіленген электр қуаты — 4000 МВт. Мұнда 8 энергия блогы бар, әрқайсысы 500 МВт қуатқа ие. Станса Екібастұздың күлі жоғары тас көмірі мен мазутты пайдаланады.

Кәсіпорында бірі — 300, екіншісі 330 метрлік қос алып мұржа орналасқан. Оның әрқайсысы 4 энергия блогына қызмет етеді. Апаттық жағдай соның алғашқы мұржасында пайда болған.

Атап өтерлігі, МАЭС-1 үлкен көлемдегі коммуналдық жылу өндірмейді. Себебі ол елді мекендерден алшақ орналасқан. Кеңес заманында Екібастұз қаласына жылу құбырын тарту туралы жоспар болған. Алайда жоба қымбатқа түседі деп есептеп, жүзеге асырудан бас тартқан.
Мұнда қазіргі уақытта 1507 адам еңбек етеді. Орташа еңбекақы көлемі 488 мың теңгені құрайды.

KEGOC компаниясының деректеріне сүйенсек, Қазақстан бойынша Біртұтас электр энергетикалық жүйе (БЭЖ) негізгі үш аймақтан тұрады. Электр стансалардың, электр жеткізу желілері мен қосалқы стансалардың жиынтығынан тұратын бұл жүйеде Павлодар облысындағы аймақтық электр стансалары айрықша мәнге ие екенін атап өткен жөн. Жүйенің «Солтүстік аймағына» Шығыс Қазақстан, Абай, Павлодар, Ақмола, Қостанай, Солтүстік Қазақстан, Ақтөбе, Қарағанды және Ұлытау облыстары енеді. Ал «Оңтүстік аймаққа» — Алматы, Жетісу, Жамбыл, Түркістан және Қызылорда облыстары, «Батыс аймаққа» Батыс Қазақстан, Атырау және Маңғыстау облыстары байлаулы.

Бұған қарап еліміздегі өнеркәсіпті аймақтар мен ауыр өндірісі дамыған өңірлер негізінен Екібастұздағы электр стансаларының қуатына тәуелді екенін байқауға болар. Оның үстіне отандық электр қуатының 40 пайыздан астамы Ертіс-Баян жерінде өндірілетінін ескерген абзал. Елдегі ұлттық маңызы бар 8 электр стансасының үшеуі Павлодар облысында орналасқан (Екібастұз МАЭС-1, Екібастұз МАЭС-2 және «ЕЭК» АҚ электр стансасы). Олардың белгіленген жиынтық қуаты — 7035 МВт.

ҚР Энергетика министрлігінің ақпарынша Қазақстанда 2023 жылы 112,8 млрд киловат электр қуаты өндіріліп, тұтынушыларға тасымалданған. Ал Екібастұз МАЭС-1 стансасы былтыр 22,8 млрд киловатт электр қуатын өндірген. Бұл — еліміздегі жалпы қуаттың 20,21 пайызы. Яғни еліміздегі энергия өндірісінің бестен бірі аталған кәсіпорынға тиесілі. Сондай-ақ Екібастұз МАЭС-2 стансасы өткен жылы — 5,6 млрд, «ЕЭК» АҚ 16 млрд киловатт қуат өндірген.

Еске сала кетейік, 2022 жылдың 27 қарашасында Екібастұз ЖЭО-сында апат болып, қала тұрғындары қатты аязда жылусыз қалған еді.

Бүгін жазғанымыздай, Екібастұз № 1 МАЭС стансасында бір энергия блогы кенеттен жұмысын тоқтатты.

Екібастұз электр стансасындағы апатқа байланысты министрлік түсініктеме берді.