Елена Рыбакина Алматыдағы кездесуін кейінге қалдырды

НҰР-СҰЛТАН. ҚазАқпарат – Уимблдон чемпионы Елена Рыбакина Алматыдағы кездесуін кейінге қалдырды, деп хабарлайды ҚазАқпарат тілшісі.

Қазақстан теннис федерациясынан мәлім еткендей, Елена Рыбакина Алматыға баруды бүгінге жоспарлап еді.

«Қымбатты алматылықтар! Уимблдондағы жеңістен кейінгі қуанышты бөлісу үшін бүгін сіздерге жетемін бе деп ойлап едім. Өкінішке қарай, соңғы күндердегі шаршағандық пен жүйкеге түскен салмақ жоспарымды өзгертіп жіберді. Толық қалпыма келу үшін үзіліс алуға тура келді. Сіздің тамаша қалаңызға келесі жолы міндетті түрде барамын. Түсіністік танытып, қолдау көрсеткендеріңіз үшін алғыс айтамын», - деді Е. Рыбакина.

Елена кеше елордада болып, бірнеше кездесу өткізген еді.

Еске сала кетейік, бұдан бұрын Юлия Путинцеваның Будапешт турнирін жеңіспен бастағанын жазған болатынбыз.