Елена Рыбакина Моника Селеш пен Мария Шарапованың жетістігін қайталады

АСТАНА. ҚазАқпарат – Қазақстанның бірінші ракеткасы Елена Рыбакина 1968 жылдан бері бір маусымда Аустралия ашық чемпионаты және Индиан-Уэллс, Майами және Рим WTA 1000 турнирлерінің финалына шыққан үшінші ойыншы атанды, деп хабарлайды ҚазАқпарат тілшісі.

Бұған дейін мұндай табысқа әлемнің бұрынғы бірінші ракеткалары, америкалық Моника Селеш 1991 және ресейлік Мария Шарапова 2012 жылы жеткен еді.

Е.Рыбакина бүгін Рим мастерс турнирінің финалында әлемнің 47-ракеткасы, украиналық Ангелина Калининамен ойнайды. Оны жеңген жағдайда қазақстандық теннисші әлемдік рейтингте рекордтық нәтижеге қол жеткізіп, төртінші орынға көтеріледі.

Финалдық матч Астана уақытымен сағат 23.00-де басталады.

Қарсыластар өзара бір рет кездескен. 2022 жылы Чарльстон WTA 500 жарысының екінші айналымында А.Калинина 6:4, 2:6, 6:4 есебімен жеңіске жетті.

Е.Рыбакинаның мәлім еткеніндей, қос теннисші бір-бірімен жақсы қарым-қатынаста.

Еске сала кетейік, бұдан бұрын Анна Данилинаның Париж турнирінің финалына шыққанын жазған болатынбыз.

Сондай-ақ Елена Рыбакина Азия – Тынық мұхит аймағы бойынша үздік өкілдердің қатарына енді.

Елена Рыбакина алғаш рет Рим мастерс турнирінің финалына шықты.