Елімізде 2 миллионнан астам оқушы жазғы лагерьлерде демалады
АСТАНА. ҚазАқпарат - Қазақстанда жазғы демалысқа оқушылардың 70%-дан астамы тартылады, яғни 2 млн.-нан астам оқушы жазғы лагерьлерде демалады. Бұл туралы бүгін өткен баспасөз мәслихатында ҚР БҒМ Мектепке дейінгі және орта білім беру, ақпараттық технологиялар департаментінің директоры Жаңыл Жонтаева айтты.
«Біз 1 мен 10 сыныптар аралығындағы балаларды тартамыз. Бұлар ұымдастырылған жазғы демалыспен қамтылған екі миллионнан астам балалар. Ал биылғы жазда сонымен қатар 1 млн. 612 мың бала, яғни барлық оқушының 69%-ы денсаулық сақтау шараларымен қамтылады», - деді ол.
Жаңыл Жонтаеваның мәліметінше, 1 маусымда жыл бойы жұмыс істейтін 260 қаласырты лагерьлерінің 173-і қызметіне кірісті, қалғандары 15 маусымда ашылады. Қала сыртындағы лагерьлерден басқа 11 мыңнан астам сауықтыру лагерьлері мен алаңдар бар.
