Елімізде қазіргі уақытта «доңыз тұмауына» шалдыққан бірде-бір оқиға тіркелген жоқ - А. Белоног

АСТАНА. Сәуірдің 30-ы. ҚазАқпарат /Ернұр Ақанбай/ - Елімізде қазіргі уақытта «доңыз тұмауымен», сондай-ақ «құс тұмауымен» ауырған бірді-бір оқиға тіркелген жоқ. Бұл туралы бүгін Үкімет отырысында Қазақстанның Бас санитарлық дәрігері Анатолий Белоног мәлім етті,

деп хабарлайды ҚазАқпарат. «Елімізде барлық 93 санитарлық-карантиндік бекеттер жұмыс істеуде. Оның 18-і - әуежайларда, 2-уі - теңіз айлақтарында, 27-сі - темір жолдарда, 46-сы автоөткелдерде орналасқан. 29 автоөткелдерде тек кедендік бекеттер ғана жұмыс істеп жатқанын ескеріп, біздер Кеден қызметімен келісіп ол жерлерге адамдарды уақытша санитарлық-карантиндік бақылаудан өткізу үшін санитарлық эпидемиологиялық қызметтің мамандарын жібердік. Адамның денесіндегі температура деңгейін байланысқа түспей анықтау үшін Астана, Алматы, Атырау, Ақтөбе, Ақтау және Қарағанды қалаларының халықаралық әуежайларында «тепловизорлар» тұрақты жұмыс істеуде. Қазіргі уақытта республикамыздағы халық арасында «доңыз тұмауымен», сондай-ақ «құс тұмауымен» ауырған бірді-бір оқиға тіркелген жоқ», деді отырыста А. Белоног.Оның айтуынша, республикамызда 30 мың адамға арналған вирусқа қарсы «Терафлю» атты препарат бар. «Дүниежүзілік денсаулық сақтау ұйымының ұсынымы бойынша, бұл «доңыз тұмауымен» ауырған адамды емдеу үшін пайдаланылатын өте тиімді препарат. Әрбір облыста 100 ауру адамды емдеуге қажетті дәрі бар. Өткен жылдың күзі мен осы жылдың көктемінде республикамызда тұмауға қарсы жаппай егу жұмыстары жүргізіліп, 500 мыңнан астам адам егілді. Бұл инфекцияның таралу жолына қажетті кедергі жасайды. Дүниежүзілік денсаулық сақтау ұйымы сарапшыларының қорытындысы бойынша, тұмауға қарсы әдеттегі осындай егу жұмысы «доңыз тұмауы» орын алған жағдайда өлім-жітімнің алдын-алуға мүмкіндік береді», - деді ол. Оның сөзіне қарағанда, аурудың негізгі белгілері маусымдық тұмаумен ұқсас. Бұл: жоғары температура, бұлшық еттердің ауыруы, ресторатуралық көріністер. Ал инфекция ауамен-сілекей жолымен таралады. «Дүниежүзілік денсаулық сақтау ұйымының мамандары егер бұл індеттің тұтануы пандемияға айналып кететін болса доңыз тұмауына 1,5 млрд. адамның шалдығуы, оның 7 миллионы өмірмен қоштасуы мүмкін екенін айтуда», - деді бас санитарлық дәрігер.