Елімізде пәтер тонау 30 пайызға төмендеді
НҰР-СҰЛТАН. ҚазАқпарат – 2021 жылдың 4 айында елімізде пәтер тонау 30 пайызға қысқарды. Бұл жайында ҚР ІІМ Криминалдық полиция департаменті бастығының орынбасары Қанат Нұрмағамбетов мәлім етті, деп хабарлайды ҚазАқпарат тілшісі.
«Толықтай алғанда, қабылданған іс-шаралар соңғы 5 жылдың ішінде пәтер ұрлығының санын 67 пайызға төмендетуге мүмкіндік берді. Сонымен қатар оң үрдіс осы жылы да байқалып отыр. Биыл 4 айдың ішінде олардың саны 30 пайызға қысқарды. Бұған қоса, мұндай қылмыстарды ашу 13 пайызға жақсарды», - деді ол Ішкі істер министрлігінің баспасөз қызметі алаңында өткен брфинг барысында.
Сонымен қатар ол Ішкі істер министрлігі пәтер ұрлығының алдын алуға бағытталған республикалық іс-шараны тұрақты түрде өткізетіндігін айтты.
«Криминогендік ахуалға алдын алу іс-шаралары оң ықпалын тигізіп отыр. Ұрлыққа қарсы іс-қимыл жөніндегі ведомстволық бағдарламаны жүзеге асыру аясында тұрғын үйлердің аулаларына 54 мыңнан астам бейнебақылау камерасы орнатылды. Сонымен қатар тұрғындардың бастамасымен 14 мыңнан астам құрылғы қойылды. Бұл жұмыс жалғасып жатыр», - деді Қанат Нұрмағамбетов.
