Еліміздің төрт аймағында орташа құрғақшылық болжанады

АСТАНА. ҚазАқпарат – Алдын ала болжам бойынша, маусымда Қазақстанның басым бөлігінде ылғалдылық нормаға жақын болады, деп хабарлайды ҚазАқпарат «Қазгидромет» РМК-ға сілтеме жасап.

«Сонымен қатар, температуралық фонның жоғарылауымен ылғалды аумақтардың ауданы қысқарады, ал ылғал тапшылығы бар аумақтар ұлғаяды. Ақтөбе облысының Әйтеке би ауданында, Қостанай облысының Амангелді және Жангелді аудандарында, Қызылорда облысының Қармақшы ауданында орташа құрғақшылық болуы мүмкін», - делінген синоптиктер болжамында.