Еліміз экспорттық саясатын күшейтеді

АСТАНА. KAZINFORM – Қазақстан Біріккен Араб Әмірліктерімен көрсетілетін қызметтер мен инвестициялардың еркін саудасы туралы келісім жасаспақ.

Бұл туралы Сауда және интеграция министрлігінің кеңейтілген алқа мәжілісінде ведомство басшысы Арман Шаққалиев айтты.

Оның атап өтуінше, министрліктің алдына экспортты ілгерілету үшін қажетті құралдарды шоғырландыра отыра, экспортты қолдаудың бірыңғай терезесін құру міндеті жүктелген.

- Өткен жылдың қаңтар айында сақтандыру және қаржылық қолдау шараларының кең спектрін жүзеге асыруға бағытталған «Экспорттық несие агенттігі туралы» Заң қабылданды. Осы бағытта Қазақстанның экспорттық несие агенттігі қолдау құралдарының қатарын кеңейтті. Субсидиялауға балама ретінде кепілдік беру, экспорт алдындағы және сауда қаржыландыру құралдары енгізілді. Көлік дәліздерінің дамуын ескере отырып, Қытай, Еуразиялық экономикалық одақ, Орталық Азия, Еуропалық Одақ және Таяу Шығыс елдері сияқты нарықтары анықталды, - деді Арман Шаққалиев.

Сондай-ақ, ол сыртқы сауда байланыстарын кеңейту мақсатында Қазақстан мен Сингапур арасындағы көрсетілетін қызметтер мен инвестициялардың еркін саудасы туралы келісім ратификацияланғанын айтты.

- Бұған қоса толық форматты келісім Біріккен Араб Әмірліктерімен жүргізіліп жатыр. Иран және Еуразиялық экономикалық одақ аясында тауарлардың еркін саудасы туралы толық форматты келісімді ратификациялау аяқталды, - деді министр.

Осыған дейін Арман Шаққалиев сауда министрлігінің басым міндеттерін атағаны туралы жаздық.