2031 жылға қарай елімізде 1,6 млн кадр қажет – Еңбек министрлігі
АСТАНА. KAZINFORM – Алдағы 5-6 жылда елімізде құрылыс, ауыл шаруашылығы, өңдеу өнеркәсібі және денсаулық сақтау саласы мамандары сұранысқа ие болады. Толығырақ Еңбек және халықты әлеуметтік қорғау вице-министрі Асқар Биахметов айтып берді.
- Алдағы 6 жылда кадр бойынша жиынтық сұраныс 1,6 млн адам болып отыр. Оның ішінде шамамен 900 мың кәсіптік-техникалық білімі бар қызметкер және 400 мыңнан астам жұмысшы мамандар қажет. Жұмысшы кадрлар негізінен құрылыс, ауыл шаруашылығы, өңдеу өнеркәсібі және денсаулық сақтау саласында сұранысқа ие, бұл жұмысшы мамандардың 56%. Осы орайда орталық мемлекеттік органдар мен өңір әкімдіктері жұмысшы мамандықтары жылы шеңберінде іс-шаралар жоспарын іске асыруды бастады. Мемлекеттік органдардың жоспарына сәйкес жаңа кәсіпорындар ашу мен жаңа жұмыс орындарын құру (тұрақты және уақытша) негізгі міндет, – деді Асқар Биахметов орталық коммуникациялар қызметі алаңында өткен баспасөз мәслихатында.
Сондай-ақ министрдің орынбасары «Жастар практикасы» жобасы жалғасын табатынын айтты.
- Жоба аясында жас мамандарды даярлауға кемінде 35 мың тәлімгерді тарту жоспарда бар. Сонымен қатар жұмыссыз азаматтарды 6 айдан аспайтын кәсіптік оқыту ұйымдастырылады. Осы орайда биыл 100 кәсіптік стандарт әзірленіп, жаңартылады. Одан бөлек біліктілікті бағалайтын 4 тәуелсіз орталық жұмыс істейді, 5-інші орталықты ашу жоспарланып отыр, оның ішінде халықаралық стандарттар бойынша 2 орталық болмақ, - деп толықтырды вице-министр.
Бұған дейін хабарлағанымыздай былтыр елімізде 714 мың адам тұрақты жұмыспен қамтылды.
Айта кетсек, бүгін Премьер-министрдің орынбасары Ермек Көшербаев Сенатта өтіп жатқан парламенттік тыңдауда 2030 жылға қарай қай салаларда жұмысшы мамандар тапшы болатынын айтты.
