Елімізде бұралқы иттер көбейіп барады - Экология министрі

АСТАНА. KAZINFORM – Экология және табиғи ресурстар министрі Ерлан Нысанбаев елді мекендерде бұралқы иттердің көбеюі тұрғындарға қауіп төндіріп жатқанын айтты.

Оның сөзіне қарағанда, қазір бұралқы иттердің адамдарға қатысты қаупі азаймай отыр. Яғни иесіз иттер көбейіп барады. Тамақ іздеп көше кезіп жүрген иттерден тұрғындар қорқады.

«Бұл тұрғыда осы иттердің иелеріне қатысты жауапкершілігін қарастыруымыз керек. Өйткені ит асырау – үлкен жауапкершілік. Мен өзім екі ит асырап отырмын. Осы екі үлкен төбеттің күтіміне ерекше қараймын. Атап айтқанда, жалпы халықтың осы мәселеге қатыстысты жауапкершілігін қарастыру қажет. Біріншіден, күшік асырап алсаңыз, оны қартайғанша бағу керек. Мәселен, менің иттерім өте кәрі - 13 жаста. Иттер ұзақ өмір сүрмейді. Сондықтан мұндағы жауапкершілікті нақтылап, түсіндіруіміз керек», - деді Е. Нысанбаев Сенатта тілшілер сұрағына жауап бере отырып.

Тілшілер министрден иттерді бағып ұстайтын арнайы орындарды көбейту мүмкіндігі туралы сұрады.

«Менің білуімше, осындай нысандарды салуға ниет білдірген адамдарға облыстарда тиісті жер учаскелері бөлінген. Бірақ қаржыландыруға байланысты процесс ұзаққа созылады. Жалпы, бұралқы иттерден қауіп бар. Ал адамдардың денсаулығы бірінші орында болуы тиіс», - деді министр.