Елімізде датчик орнатудың арқасында 248 адам газдан уланудан аман қалды

АСТАНА. KAZINFORM — Жыл басынан бері газ иістенуінің 55 фактісі тіркелген. Датчиктерді орнатудың арқасында біраз адам тірі қалған. Бұл туралы Төтенше жағдайлар министрлігі өртке қарсы қызмет комитеті төрағасының міндетін атқарушы Ерлан Төрегелдиев мәлім етті. 

 — Газдан уланудың алдын алуға ерекше назар аударып жатырмыз. Өткен жылы 1 маусымнан бастап тұрғын үйлерге 33 мыңнан астам өрт датчигі орнатылды. Жалпы алғанда, соңғы бес жылда 228 мың датчик қойылды. Датчиктерді орнатқан уақыттан бері 55 газдың иістену фактісі тіркеліп, соның арқасында 248 адамның өмірін сақтап қалдық, — деп Ерлан Төрегелдиев орталық коммуникациялар қызметі алаңында өткен баспасөз мәслихатында.

Сондай-ақ ТЖМ өкілі халықты өрт қауіпсіздігіне қатысты ақпараттандырудың жаңа тәсілдері енгізіліп жатқанын айтты. 

— Мәселен өрт қауіпсіздігі туралы QR кодтар, LED экрандары және ата-аналар чаттары хабарламалар таратылып, насихатталады. Бұл шара өрт тәуекелі туралы ескертулерді лезде таратуға мүмкіндік береді. Одан бөлек «Өрттен сақтан», «Қауіпсіз пеш» акциялары аясында халықтың әлеуметтік осал топтағы 105 мың үй қамтылды, ал 300 мыңға жуық адамға нұсқау берілді, — дейді ол.

Осы орайда мамандар қазақстандықтарды өрт қауіпсіздігі ережелерін қатаң сақтауға шақырады. 

Бұған дейін ТЖМ өкілі қауіпсіздікті сақтамағаннан өрт шықса, үй иесінің жауапкершілігіне қатысты түсінік берген еді. 
Айта кетейік, жыл басынан бері елімізде 1 мыңнан астам өрт шығу фактісі тіркеліп, 52 адам ажал құшты.