Елімізде дипфейктер үшін қылмыстық жауапкершілік енгізілуі мүмкін

АСТАНА. KAZINFORM — Жасанды интеллект туралы жаңа заң жобасы аясында дипфейктерді құру әрекеттері үшін қылмыстық жауапкершілік жазасы енгізу мүмкіндігі талқыланады. Бұл туралы Мәжіліс депутаты Екатерина Смышляева мәлім етті.

— Шынында да, дипфейктер — жасанды интеллект технологиясының көлеңкелі жағы және ол бүгінде қарқын алып келеді. Біздің әрептестерге (депутаттар) қатысты көптеген дипфейк жасалды. Алғаш рет дипфейктер сайлау кезеңдерінде манипуляция үшін пайдаланылды, олар дәл осы мақсат үшін жасалған. Бірақ кейінірек алаяқтар мұны белсенді түрде пайдалана бастады. Әлемде әртүрлі тәсілдер қолданылады, оларды екі нұсқаға бөлуге болады. Біріншісі — дипфейктерді пайдаланғаны үшін қатаң қылмыстық жазалар болса, екіншісі — контент жасаушыға оның дипфейк жариялағанын анық көрсету үшін таңбалау талабы енгізілген, — деді Екатерина Смышляева Парламент Мәжілісінде заң жобасын таныстыру кезінде. 

Атап айтқанда, бүгін Парламент Мәжілісінде таныстырылған «Жасанды интеллект туралы» заң жобасында манипуляциялай алатын ЖИ құруға тыйым салу нормасы ескерілген. 

Бұл тұрғыда Екатерина Смышляева бұл заң жобасында адамдарды әлеуметтік, биометриялық және мінез-құлық ерекшеліктеріне қарай бағалау үшін ЖИ қолдануға қатаң шектеу енгізілетінін, сондай-ақ адам мінез-құлқын манипуляциялай алатын ЖИ құруға және пайдалануға тыйым салынатынын айтты. Осы ретте дипфейкпен күрес іс-шаралары қамтылып отыр. Заң жобасының нормаларында қылмыстық жауапкершілік қарастырылмаған, бірақ оны енгізу мәселесі құжатты алдағы талқылауларда қарастырылуы мүмкін.

Бұған дейін депутат жасанды интеллект аясында еңбек нарығына жаңа кәсіптер енгізілуі мүмкін екенін айтты.