Елімізде ер балаларға адам папиллома вирусына қарсы вакцина егілуі мүмкін
АСТАНА. KAZINFORM — Бүгінде жатыр мойны обырының негізгі қоздырғышы, яғни адам папиллома вирусына (АПВ) қарсы вакцина тек қыз балаларға егіліп жатыр.
— Адам папиллома вирусына (АПВ) қарсы вакцина АҚШ, Аустралия, Канада елдерінде 2007-2008 жылдары клиникалық зерттеуден өтіп, енгізілген. Бұл мемлекеттер вакцинаның оң әсерін көріп отыр. Өйткені, сырқаттанушылық пен вирустың айналымы төмендеген. Ол мемлекеттер қыздардан бастап, бүгінде 76 мемлекет ұлдар арасында да вакцинация жүргізеді, өйткені еркектерде вирус тасымалдаушысы болуы мүмкін, — деді Денсаулық сақтау министрлігі жанындағы Ұлттық қоғамдық денсаулық сақтау орталығы басқарма төрағасының орынбасары Манар Смағұл адам папиллома вирусына қарсы вакцинацияға арналған іс-шара барысында.
Маманның мәлімдеуінше, Қазақстанда адам папиллома вирусына (АПВ) қарсы 4 валентті вакцина егіліп жатыр, шет мемлекеттер 2015 жылдан бастап 9 валентті вакцинаға көшкен.
Осы орайда Kazinform тілшісі министрлік өкіліне Қазақстанда ер балалар арасында адам папиллома вирусына (АПВ) қарсы вакцина егілуі мүмкін бе деген сауал қойды.
— Жоспарда бар, өйткені қатерлі ісіктің алдын алуда өте жоғары тиімділігін көрсетеді. Қашан екенін айта алмаймын, — деп қысқа қайырды спикер.
Айта кетсек, бүгін елордада Ұлттық қоғамдық денсаулық сақтау орталығының ұйытқы болуымен адам папиллома вирусына (АПВ) қарсы екпе егу шарасы аясында конференция өтті. Аталған шараға сала мамандары қатысты.
Еске сала кетейік, былтыр қыркүйекте елімізде жатыр мойны обырының негізгі қоздырғышы — адам папиллома вирусына (АПВ) қарсы қыздарды жалпы вакциналау басталды. Осы орайда Kazinform агенттігінің тілшісі Қазақстанда аталған инфекцияның таралу статистикасы қандай, бұл вирус не үшін қауіпті және неге екпе алу қажет екеніне шолу жасаған еді.
Өткен жылы Үкімет адам папилломасы вирусына қарсы вакцина сатып алуға 9,7 млрд теңгеден астам қаржы бөлді.
Сондай-ақ елімізде адам папиллома вирусына қарсы вакцинаның денсаулыққа әсері зерттеліп жатқаны айтылды.
Одан бөлек, әлеуметтік желілерде және мессенджерлерде адам папилломасы вирусы (АПВ) вакцинациясы бедеулікке әкелетіні туралы жалған ақпарат тарады.
