Елімізде қанша нысан су астында қалды
АСТАНА. KAZINFORM – Еліміздің су басқан аумақтарында құзырлы органдар тәулік бойы міндеттерін орындап жатыр. Бүгінде құтқару жұмыстарына 30 мың адам және 3 мың техника жұмылдырылған.
Орталық коммуникациялар қызметінде өткен брифингіде ҚР Төтенше жағдайлар министрлігі Азаматтық қорғаныс және әскери бөлімдер комитетінің аға офицері Ерасыл Сайпаш су тасқынының ағымдағы жағдайы туралы баяндады.
«Құтқару жұмыстарына 600-ге жуық су айдау құрылғысы мен су көлігі, 16 ұшақ тартылды. Су тасқыны басталғаннан бері 98 мыңнан астам адам құтқарылды. Оның 33 мыңы – балалар. Уақытша орналастыру орталықтарында 7 мың адам жайғастырылды. Оның 3 364-і – балалар», - деді ол.
Белгілі болғандай, Атырау, Ақтөбе, Ақмола, Қостанай, Солтүстік Қазақстан және Шығыс Қазақстан облыстарында 3 497 жеке тұрғын үй, 489 аула аумақтары, 1 778 саяжай және 55 түрлі мақсаттағы ғимарат су астында қалған.
