Елімізде көмір бағасы қазір өзге елдермен салыстырғанда әлдеқайда арзан - министрлік

АСТАНА. KAZINFORM – Өнеркәсіп министрлігінің мәліметінше, Еуропа мен көршілес мемлекеттерде көмрдің құны Қазақстанмен салыстырғанда екі есе қымбат.

Жауапты ведомства келесі жылы көмір бағасы инфляцияға байланысты құбылуы мүмкін деп отыр.

Яғни жанар-жағармайдың қымбаттап, кеншілердің айлығы артса, көмір бағасы да көтерілуі мүмкін.

Қазір министрліктің қатты отын бағасын қадағалауға құзіреті жоқ. Бұл жұмыс жергілікті әкімдіктер бақылауында.

«Халыққа сатылатын көмір бағасы әр аймақта әртүрлі. Мәселен „Шұбаркөл“ көмірі коммерциялық субъектілерге сатылатын бағадан 25 пайыз арзан. Егер бағасын салыстырмалы түрде айтар болсақ, „Шұбаркөлдің“ көмірі тоннасына — тоғыз мың теңге. „Қаражыра“ одан шамалы арзан. „Майкөбе“ көмірі — 7800 теңге», — дейді Өнеркәсіп комитеті төрағасының орынбасары Тұрар Жолмағамбетов.

Айта кетейік, бұған дейін Қазақстан көмірі қай елдерге экспортталып жатқанын жазғанбыз.