Елімізде кредиттік рейтинг агенттіктерінің қызметін реттейтін заң жобасы әзірленді

АСТАНА. KAZINFORM — Елімізде кредиттік рейтинг агенттіктерінің қызметін реттейтін заң жобасы әзірленді. Бұл туралы Қаржы нарығын реттеу және дамыту агенттігі Бағалы қағаздар нарығы департаментінің директоры Айдын Дәулетбақ айтты.

— Қаржы нарығын реттеу және дамыту агенттігі халықаралық тәжірибеге сүйене отырып, кредиттік рейтинг агенттіктерінің қызметін реттейтін заң жобасын әзірледі. Заң жобасында бірнеше халықаралық ұйымдардың ұсыныстары ескерілді. Мысалға, IOSCO — Бағалы қағаздар жөніндегі комиссиялардың халықаралық ұйымының стандарттары. Ол кредиттік рейтингтік агенттіктер үшін кәсіптік мінез-құлықтың негізгі қағидаттарын айқындайды және бағалы қағаздар нарығын реттеу мақсаттарын белгілейді, — деді департамент басшысы Орталық коммуникациялар қызметіндегі брифингте.

Сондай-ақ, Айдын Дәулетбақ Базель банктiк қадағалау комитетінің талаптары қарастырылғанын айтады. Ол Базель II және Базель III аясында кредиттік тәуекелдерді бағалау агенттіктеріне қойылатын біліктілік талаптарын айқындайды.

— Еуропалық одақтың рейтингтік қызметтерге қатысты директивалары да ескерілді. Заң жобасы рейтинг агенттіктерінің жұмысының негізгі қағидаттарын қамтамасыз етуге бағытталған. Олар: объективтілік, тәуелсіздік, ашықтық, ақпаратты жария ету, ресурстардың жеткіліктілігі, агенттіктердің қадағалануы мен есептілігі. Бұл заң жобасы Қаржы секторын дамытудың 2030 жылға дейінгі тұжырымдамасын жүзеге асыру аясында әзірленген. Оның қабылдануы елімізде тәуелсіз рейтингтік бағалау институтының дамуына жағдай жасайды. Бұл өз кезегінде, қор нарығы арқылы бизнесті қаржыландыру тетіктерін кеңейтеді, — деді ол.

Осы жылдың ақпанында Standard& Poor’s халықаралық рейтинг агенттігі Қазақстанның тәуелсіз кредиттік рейтингін «BBB-/А-3» деңгейінде растады, болжам — «Тұрақты».