Елімізде сол аяғы оң аяғынан 7 см қысқа науқасқа ота жасалды

Алматыдағы № 4 қалалық аурухананың травматолог-ортопедтері науқасқа туа біткен ортан жіліктің шығуы мен жамбас буынының төртінші дәрежелі дисплазиясын түзету үшін бірегей әрі күрделі операция жасады, деп хабарлайды Kazinform. 

Тараз қаласындағы клиникаларының бірінде мейіргер болып істейтін 27 жастағы жігіттің туа бітті кемістігі бар. Сол аяғы оң аяғынан 7 см-ге қысқа. Бұл бүкіл тірек-қимыл жүйесіне ауыр жүктеме.

Алматыдағы № 4 қалалық ауруханасына медициналық тексеруден өтуге келген науқасқа дәрігерлер операция жасатуға кеңес берді.

«Науқас бізге консультацияға келгенде, оған операция жасауды ұсындық. Сол аяққа ота жасадық, енді бірер айдан кейін екінші жамбас буынына ота жасаймыз. Содан кейін науқас жүріп, ақсақтықтан құтылады», - дейді №4 қалалық клиникалық аурухананың эндопротездеу бөлімінің меңгерушісі Манарбек Әубәкіров.

Операцияға Ресейден келген Г.А.Илизаров атындағы Ұлттық медициналық травматология және ортопедия орталығының дәрігері Андрей Каминский қатысты. Қазақстандық және ресейлік дәрігерлердің бірлескен операциясы 4 сағатқа созылды.

«Алматылық хирургтарымен бірге бір операцияға қатыстым. Операция шынымен де өте күрделі болды және мұндай операцияны таңдау үшін дәрігерлердің сәйкес кәсібилігі, білімі мен тәжірибесі қажет. Эндопротез мінсіз орнатылды», - деп атап өтті Андрей Каминский.