Елімізде суррогат алкоголь өндірісі өршіп тұр

АСТАНА. KAZINFORM — 2024 жылы және 2025 жылдың ағымдағы кезеңінде суррогат алкоголь өндірісіне қатысты 54 іс тіркеді. 

ал
Фото: gazeteoksijen.com

Бұл туралы Мәжіліс депутаттарының сауалына Премьер-Министрдің орынбасары Ермек Көшербаевтың жауабында айтылған.

— Қаржы мониторингі агенттігі 2024 жылы және 2025 жылдың ағымдағы кезеңінде суррогат алкоголь өндірісі бойынша 54 іс тіркеді. 25 жерасты цехы жойылды, заңсыз айналымнан 205,4 мың бөтелке суррогат сусындары, 354 мың литрден астам спирт және құрамында спирті бар сұйықтықтар, сондай-ақ 61 мың контрафактілік есепке алу және бақылау белгілері алынды. 2025 жылы жерасты цехтарында жүргізілген есепке алу және бақылау белгілері бар 9 320 бөтелке контрафактілі алкоголь өнімі тәркіленді, — деді вице-премьер.

Оның атап өтуінше, алкоголизмнің алдын алу және алкогольді тұтынуды азайту тұрғысынан Денсаулық сақтау министрлігі салауатты өмір салтын ұстанатын халықтың үлесін арттыруға және мінез-құлық қауіп факторларын төмендетуге бағытталған іс-шараларды іске асырып жатыр. Жыл сайын Ұлттық алкогольден бас тарту күніне орай ауқымды ақпараттық науқан өткізіледі. Мәдениет және ақпарат министрлігі мүдделі мемлекеттік органдармен бірлесіп, халықты алкогольді тұтынудың зияны және оның теріс салдары туралы хабардар етуге бағытталған ақпараттық-түсіндіру жұмыстарын жүргізеді.

— Заңсыз алкогольді сату және таратуды алдын алу бойынша интернет желісіне тұрақты мониторинг жүргізіледі. 2024 жылы 18 интернет-ресурс анықталып, оларға тиісті нұсқамалар жіберілді. Құқық қорғау органдары азаматтық қоғам өкілдерімен, еріктілермен және жастар ұйымдарымен («Дала қырандары», «Жаңа адамдар») бірлесіп, алкоголь өнімінің заңсыз айналымы фактілерінің жолын кесу бойынша тұрақты рейдтер ұйымдастырады. Өңірлердегі жастар ресурстық орталықтары жастарды салауатты өмір салтына тартуға және олардың спорттық дағдыларын дамытуға бағытталған іс шараларды тұрақты түрде өткізеді, — деді Ермек Көшербаев.

Жақында Қызылорда облысында бір ауыл алкоголь өнімін сатудан бас тартқаны белгілі болды.

Соңғы жаңалықтар