Елімізде төтенше жағдайдан хабардар ету қағидасы жаңарды

АСТАНА. KAZINFORM – Халықты төтенше жағдайдан құлағдар ету тәртібі жаңартылды.

Төтенше жағдайлар министрлігінің өзгерістер мен толықтырулар енгізген құжатта айтылғандай, «Баршаның назарына!» дабылы іске қосылған жағдайда хабарлау жүйесі халыққа төтенше жағдайдың қаупі немесе туындауы туралы және іс-қимыл тәртібі жөніндегі ақпаратты бір мезгілде әрі бірнеше рет жеткізуді қамтамасыз етеді.

- Біртұтас «Баршаның назарына!» дабыл сигналының ұзақтығы – 1 минут. Дабылдан кейін ұзақтығы 5 минутқа дейінгі ақпараттық хабарлама мемлекеттік және орыс тілінде таратылады. 1 сағат ішінде ақпараттық хабарламаны 3 реттен артық қайталауға болмайды әрі ол хабарлау жүйесін пайдалануды доғару туралы шешім қабылданғаннан кейін тоқтатылады, - делінген құжатта.

«Баршаның назарына!» дабыл сигналынан кейін халық іс-қимыл, яғни әрекет ету нұсқаулықты алып, оны орындау үшін қолда бар ақпарат алу құралын пайдаланады.

Халыққа төтенше жағдайдың қаупі туралы профилактикалық сипаттағы ақпаратты жеткізу сиреналық-дыбыстық құрылғылар арқылы үш рет қайталап беру, теле- және радиохабар тарату желілерін бұғаттау, мобильді қосымшаларда, ресми интернет-ресурстар мен әлеуметтік желілердегі аккаунттарда жариялау, сондай-ақ ұялы байланыс операторларының желілері бойынша, соның ішінде Cell Broadcast технологиясын қолдана отырып, SMS тарату жолымен жүзеге асырылады.

Сиреналық-дыбыстық құрылғылар арқылы ақпарат жеткізу уақыты сағат 08:00-ден 22:00-ге дейінгі аралықта жүзеге асырылады.

Бұйрық 2025 жылғы 2 қыркүйектен бастап күшіне енеді. Толығырақ сілтемеге өтіп танысуға болады. 

Бұған дейін Төтенше жағдайлар министрінің бұйрығымен құтқарушыларға үстемеақы төлеу қағидалары жаңартылғаны туралы хабарлаған едік.