Елімізде жазғы демалыс орындарында балалардың неше пайызы қамтылады

АСТАНА. KAZINFORM – Оқу-ағарту министрлігі 3 млн-нан астам бала жазғы сауықтыру орталықтарында демалатынын жариялады.

«Мемлекет басшысының балаларды сауықтыруға арналған 50 орталықты іске қосу жөніндегі тапсырмасы аясында осы жылы Абай, Атырау, Қостанай, Жетісу облыстарында және Астана қаласында жалпы 5 жаңа орталықты ашу жоспарланған. Жазғы маусымда 10 мыңнан астам сауықтыру орталығы жұмыс істейді, оларда 92% немесе 3 млн-нан астам оқушы жазғы сауықтырумен, демалыспен қамтылмақ», - делінген министрліктің Kazinform агенттігіне берген жауабында.

Ведомство мәліметінде, осы мақсатта министрлік демалыс орталықтарының әрбір түріне қатысты бірыңғай талаптарды қамтитын әдістемелік ұсынымдар жинағы әзірленіп, әкімдіктерге жолдады. Жинақта жазғы демалысты сапалы ұйымдастыруға қажет барлық нормативтік-құқықтық акті қамтылған. Жазғы сауықтыру лагерьлері өңірдегі қажет деңгейге сәйкес жергілікті бюджет есебінен қаржыландырылады.

«Қазір жергілікті атқарушы органдардың мәліметі бойынша 3 млн-нан астам (тегін, ақылы негізде) бала жазғы сауықтыру орталықтарында демалатын болады. Тегін лагерьлермен мемлекеттік атаулы әлеуметтік көмек алуға құқығы бар отбасылардан, сондай-ақ жан басына шаққандағы орташа табысы ең төменгі күнкөріс деңгейінен төмен әрі мемлекеттік атаулы әлеуметтік көмек алмайтын отбасылардағы оқушылар, жетім балалар, ата-анасының қамқорлығынсыз қалған отбасыларда тұратын балалар және өзге де санаттары қамтылады», - деп аталып өткен Оқу-ағарту министрлігі ақпаратында.

Еске салсақ, жақында Мәжіліс депутаты Елнұр Бейсенбаев еліміздегі балалардың жазғы демалыс орындарын сынға алды.

«Ашығын айту керек, балалардың жазғы демалыспен қамтылуы туралы статистика көкейге қонбайды. Өйткені, жергілікті әкімдіктер мектеп жанындағы лагерьлерді жазғы лагерь деп есептейді. Атап айтқанда, мектеп жанындағы лагерьлер – жазғы демалыс емес. Ол тек қана 5-6 сағат уақыт өткізуге арналған», - деді депутат.