Еліміздегі кәсіби футбол жарыстарын өткізу құқығының ҚФФ-ға қайтарылуының тиімділігі қандай

АСТАНА. KAZINFORM - ҚФФ еліміздегі кәсіби футбол жарыстарын өткізу құқығын Қазақстан футбол федерациясына қайтаруға қатысты пікірін білдірді.

пресс-службы КФФ
Фото: ҚФФ

Федерацияның айтуынша, бұл - басқаруды оңтайландырып, жарыстарды өткізудің ашықтығы мен тиімділігін арттыруға бағытталған қадам.

- Соңғы жылдары чемпионаттарға қатысу үшін төленетін жоғары жарна клубтарға қаржылық ауыртпалықты күшейтті. Осыған байланысты Қазақстан футбол федерациясы (ҚФФ) бұл жарналарды 10%-ға төмендету туралы шешім қабылдады. Бұл өзгеріс реформаның алғашқы қадамы ретінде қарастырылып отыр. Алдағы уақытта жағдайға қарай осы бағыттағы жұмыстар жалғасады. Жарналардың азаюы клубтарға қаржылық қиындықтарға алаңдамай, жарыстарға белсенді қатысуға мүмкіндік береді, - деп атап өтті федерация.

Оған қоса келешекте футбол инфрақұрылымын реформалаудағы маңызды қадамдардың бірі – төрешілерді қаржыландыру жүйесін өзгертуге көңіл бөлінеді. Бұған дейін матчтағы төрешілерге кететін шығындарды қабылдаушы клуб өз мойнына алатын. Ал бұл командаларға қосымша салмақ түсіретін. 

- Енді бұл шығынды Қазақстан футбол федерациясы (ҚФФ) өз есебінен жабады. Бұл өзгеріс клубтардың қаржылық жүктемесін азайтып қана қоймай, төрешілік жүйенің ашықтығын қамтамасыз етіп, мүмкін болатын мүдделер қақтығысын болдырмауға септігін тигізеді.
Реформа аясында төрешілерге қатысты тағы бір өзгеріс енгізілмек – енді олардың есімдері тек матч күні жарияланады. Бұл шешім төрешілерге ойынға дейінгі қысымды азайтып, сыртқы ықпалдан қорғауға бағытталған. Осылайша, арбитрлер өз міндетін барынша объективті әрі тәуелсіз атқара алады, - деп толықтырды федерация.

Кәсіби футбол жарыстарын ұйымдастыру құқығының ҚФФ-ға қайтарылуының тағы бір маңызды қыры – матчтардың трансляция сапасын айтарлықтай жақсарту және медиа мүмкіндіктерді кеңейту.

- Өзгерістер спорттық жағына ғана емес, көрермендер үшін трансляцияларды тартымды етуге де бағытталған. Бұл ең алдымен техникалық сапаны жақсартуды қамтиды: бейне сапасын арттыру, операторлар мен режиссерлердің кәсіби жұмысын жетілдіру, сондай-ақ заманауи технологияларды пайдалану арқылы жанкүйерлерге ойын барысын мейлінше жоғары деңгейде ұсыну.

Мұндай қадам көрермендердің қызығушылығын арттырып қана қоймай, футболға жаңа жанкүйерлерді тартуға да ықпал етеді. Бұған дейін көрермендер матчтардың сапасыз көрсетілімі мен жалпы медиа қолдаудың әлсіздігіне жиі шағымданған еді. Реформаның басым бағыттарының бірі – осы мәселелерді түбегейлі шешіп, футболдың көрерменге қолжетімділігін арттыру.

Сонымен қатар, бұл өзгерістер клубтар мен чемпионаттардың түрлі платформаларда – дәстүрлі телеарналарда да, онлайн кеңістікте де белсенділігін арттыруды қамтиды. Футбол оқиғаларының әлеуметтік желілер, мобильді қосымшалар және басқа да арналар арқылы кеңінен таралуы клубтар, ойыншылар және жанкүйерлер арасындағы байланысты нығайтуға мүмкіндік береді, - деп хабарлады федерация. 

Мұнда тек қаралым санын көбейту ғана емес, жанкүйерлерге командамен тікелей қарым-қатынас жасау, пікір білдіру, эксклюзивті контентке қол жеткізу мүмкіндігін беру де маңызды рөл атқарады. 

Бұл өзгерістер футболға деген қызығушылықты арттырып, жанкүйерлердің ойыншылар мен клубтарға жақындай түсуіне ықпал етеді. Жалпы, бұл реформалар отандық футболдың дамуына жаңа серпін беріп, клубтардың қаржылық тұрақтылығын нығайтуға және төрешілер жүйесіне деген сенімді арттыруға ықпал етеді. Бұл өзгерістер елде футболдың одан әрі дамуы мен танымалдылығын арттыру үшін маңызды.

Федерация негізгі мақсаты – жарыстарды ұйымдастыру мен басқаруға барынша қолайлы жағдай жасау деп санайды. Қабылданған шешім стратегиялық мақсаттарға қол жеткізуге және Қазақстандағы футбол процестерін басқарудың тиімділігін арттыруға бағытталған, - деп жазылған хабарламада.

Еске салсақ, өткен жылдың желтоқсан айында Қазақстан футбол федерациясының жаңа президенті тағайындалды.

Соңғы жаңалықтар