Еліміздегі қоқыс полигондарының 20,6% ғана рұқсат құжаты бар

АСТАНА. KAZINFORM — Қазақстанда қоқыс полигондарының көбі толып қалған, оларды қалпына келтіру қажет. Бұл мәселені Экология және табиғи ресурстар министрі Ерлан Нысанбаев көтерді.

— Өткен жылдың қорытындысы бойынша 2 973 қоқыс полигоны бар, оның 608-нің талапқа сәйкес рұқсат құжаты бар, бұл бар-жоғы 20,6%. Полигондардың көбі толып қалған, оларды қалпына келтіру қажет. Мысалы, Атырау, Түркістан, Батыс және Солтүстік Қазақстан облысы мен Шымкент қаласы полигондары 90% аса толған, Астана қаласында 98%-ға толған, ал Жезқазған қаласында шамадан тыс толып кеткен, — деді Ерлан Нысанбаев Үкімет отырысында.

Осы орайда министр 2023 жылы Үкімет кешенді іс-шаралар жоспарын бекіткенін айтты. 

— Жоспарға сай 100 жаңа полигон салу көзделген. Бүгінде әкімдіктер тек 7-ін салып, іске қосты. 23 полигонның құжаты дайын, 18 полигон бойынша құжат әзірленіп жатыр, — дейді ведомство басшысы.

Айта кетейік, бүгін Үкімет отырысында Олжас Бектенов халықтың экологиялық мәдениетін арттыру бойынша нақты ұсыныстар әзірлеуді жүктеді. 

Сондай-ақ Премьер-министр қоқыс тастайтын адамдарға жазаны қатаңдатуды тапсырды.