Елімізден қандай мамандар кетіп жатыр
АСТАНА. KAZINFORM — Елімізден сыртқа кетіп жатқан мамандардың 73% еңбекке қабілетті жастағы азаматтар. Бұл туралы Еңбек және халықты әлеуметтік қорғау вице-министрі Олжас Анафин мәлім етті.
— Қазақстаннан халықтың тұрақты түрде кетуі байқалады. Мәселен, 2019 жылы елден 159 мың азамат біржола кеткен, олардың негізгі бөлігі солтүстік, орталық және шығыс өңірлеріне тиесілі. Бұл шамамен 105 мың адам, — деді Олжас Анафин Сенат қабырғасында өткен іс-шара барысында.
Оның айтуынша, Қазақстаннан кеткен азаматтардың 80%-ы ТМД елдеріне қоныс аударып жатыр.
— Елден кеткендердің 73% еңбекке қабілетті жастағы азаматтар, олардың ішінде 30%-ы — техника, экономика және педагогика саласындағы білікті кадрлар, — деп атап өтті Олжас Анафин.
Дегенмен вице-министр ел ішінде ішкі көші-қонның қарқын алғанын айтып отыр.
— 2024 жылы ішкі көші-қон аясында 689,5 мың адам өңірлер арасында қоныс аударды. Олардың 411,4 мыңы аймақтарға орналастырылды. Ішкі халық қозғалысы бойынша ең үлкен ағын Астана, Алматы және Шымкент қалаларына бағытталған, бұл негізгі ішкі көші-қонның 50,6%-ын құрайды, — деді вице-министр.
Бұған дейін Олжас Анафин қазақстандықтар солтүстік өңірлерден көшу жалғасып жатқанын айтқан болатын.
Бүгін Сенаттың Әлеуметтік-мәдени даму және ғылым комитетінде «Демографиялық өсу –ұлттың стратегиялық артықшылығының негізі» тақырыбында былтыр өткен Үкімет сағатында қабылданған ұсынымдарды іске асыру қорытындыларын талқылауға арналған кеңейтілген отырыс өтті.
