Елорда күнінде Ақтөбеде Сәңкібай батырға арналған ескерткіш пен саябақ ашылды
АҚТӨБЕ. ҚазАқпарат - Бүгін Ақтөбеде Сәңкібай батырға арналған ескерткіш пен саябақ ашылды. Салтанатты шара Астананың туған күніне орайластырылды.
Қала әкімі Ерхан Омаров жиналған жұртты қаланың көркіне сән қосқан с аябақ пен ескерткіштің ашылуымен құттықтады.
Ескерткіш пен саябақтың салынуына Сәңкібай батыр атындағы қоғамдық қор үлкен үлес қосты. Ескерткіш авторы - Жеңіс Жұбанқосов. «2010 жылы біз қоғамдық қор құрып, Сәңкібай батыр ескерткішін салуға қайырымдылық жинай бастадық. Содан бері 10 млн-ға жуық қаражат жиналды. Кейін қала билігіне жерлесімізге арнап ескерткіш орнатуға қолдау көрсетуін өтіндік. Олар өтінішімізді жерге тастамады. Қайырымдылықты жинауға Мұғалжар, Байғанин, Темір аудандарының кәсіпкерлері мен әкімдіктері көп көмектесті», - деді қордың төрағасы, батырдың сегізінші ұрпағы Совет Байқадамов.
