Елордада балаға пышақпен шабуылдаған жасөспірім арнайы есепте тұрған

АСТАНА. KAZINFORM — Әлеуметтік желіде елордадағы тұрғын үйлердің бірінің лифтінде белгісіз жасөспірімнің кішкентай балаға пышақпен шабуыл жасағаны туралы ақпарат тарады.

Бұл деректі Астана қалалық полиция департаменті растады.

— Оқиғаны тергеу барысында психоневрологиялық диспансерде есепте тұрған жасөспірім анықталды. Оның заңды өкілдері полицияға шақырылды. Олар тәлім-тәрбие беру міндеттемелерін дұрыс орындамағаны үшін заңнамаға сәйкес қатаң жауапкершілікке тартылады, — деп атап өтті ведомстводан.

Департамент мәліметінше, зардап шеккен сәби ауруханаға жатқызылып, қажетті медициналық көмек көрсетілді. 

— Аталған факті бойынша қылмыстық іс қозғалды. Шабуыл жасаған жасөспірім қажетті тергеу амалдары жүргізілгеннен кейін белгіленген тәртіппен оқшауланады, — делінген таратылған ақпаратта.

Еске салсақ, осыған дейін Астанада жас жігіт туыстарын пышақтап тастағаны хабарланды. Салдарынан бір адам өліп, үшеуі жараланғаны белгілі болды.