Елордада бәйге жарыстары мен көкпардан республикалық турнир өтеді
АСТАНА. KAZINFORM – Астанада 10-12 қазан күндері «Қазанат» атшабарында Республика күніне және Қазақстан Республикасы мәслихаттарының құрылғанына 30 жыл толуына орай Ұлттық ат спорты фестивалі аясында бәйге жарыстары және көкпардан ересектер арасында Солтүстік аймақтың шабандоздарына арналған республикалық турнир өтеді. Бұл туралы елорда әкімдігінің ресми сайты хабарлады.
Ұлттық спортты дамыту арқылы саламатты өмір салтын насихаттау және көкпардан үздік спортшыларды анықтау мақсатында өтетін турнирге бүгінге дейін 7 команда тіркелді.
«Көкпарға Қарағандыдан 2 команда, Астана мен Ақмола, Павлодар, Қостанай және Солтүстік Қазақстан облыстарынан бір командадан тіркелді. Тіркелу әлі де жалғасып жатыр. Турнир бағдарламасына сәйкес, 10 қазан күні жарыстың алғашқы күні көкпаршылар, шабандоздар, атбегілер келіп орналасып, мандат комиссиясы мен төрешілер алқасының отырысы, жеребе тарту, жарыс аттарын алаңмен таныстыру іс-шаралары өтеді. Жалпы 11 қазанда көкпардан топтық ойындар басталады. Ал, 12 қазан күні көкпардан финалдық ойындар ұйымдастырылады. Мұнда жүлделі алты орын болады. Көкпар турнирінің жалпы жүлде қоры – 12 000 000 миллион теңгені құрайды», - деді жарыстың бас төрешісі Ерлан Канапин.
Сондай-ақ фестиваль аясында бәйге түрлерінен сайыстар өтеді. Яғни бәйгенің құнан бәйге, жорға жарыс, топ бәйге, аламан бәйге ұйымдастырылады.
«Жалпы бәйге бойынша бүгінде онлайн түрде 8 ат тіркелді. Оның ішінде «Аламан» бәйгеге – 5 ат, құнанға – 3 ат. Бәйге жарыстарының жалпы жүлде қоры – 20 000 000 милллион теңге. Соның ішінде «аламан» бәйге ғана 5 орынға дейін жеңімпаздарды анықтайды. Қалған бәйге түрлері 3 орын ғана», - деді Астана қаласы бойынша «Бәйге» федерациясының төрешісі Гульнара Базарханова.
Айта кетейік көпшілік көз тіккен жүйріктер додасының ашылу салтанаты 12 қазан күні сағат 11.00-де өтеді. Көрермендер үшін ұлттық ат спорты фестиваліне кіру тегін. Сондай-ақ «Қазанат» атшабарына № 303, 309 және 323 автобустар қатынайды.
