Елордада ер адам үстіне бензин құйып, өз-өзін өртемек болған

НҰР-СҰЛТАН. ҚазАқпарат – Оқиға орнына жедел жеткен полиция қызметкерлері 30 жастағы жігітті райынан қайтарып, оқыс жағдайдың алдын алды, деп хабарлайды ҚазАқпарат тілшісі қалалық Полиция департаментінің баспасөз қызметіне сілтеме жасап.

«Бүгін сағат 16.30-дар шамасында «102» нөміріне Қабанбай батыр көшесінің бойындағы кеңселік ғимаратта белгісіз ер адамның үстіне бензин құйып, өзін-өзі өртегісі келетіні жайлы хабарлама келіп түсті. Оқиға орнына жедел жеткен патрульдік полиция қызметкерлері жігітті райынан қайтарып, оқыс жағдайдың алдын алды», - деп хабарлайды Полиция департаментінен.

Медициналық куәландыру көрсеткендей, ер адам оқиға кезінде мас болған. Аталған факт бойынша 30 жастағы қала тұрғынының үстінен ӘҚБжК-ның 440-бабы (қоғамдық орында алкогольдік ішімдік ішу немесе мас болып келу) және 434-ші бабы (ұсақ бұзақылық) бойынша әкімшілік хаттама толтырылғаны хабарланып отыр.