Елордада құрылысы ұзаққа созылған сауда орталығы сатылымға қойылды
АСТАНА. KAZINFORM — Елордада Республика даңғылы мен Иманов көшесінің қиылысында сауда және ойын-сауық орталығының құрылысы бірнеше жылдан бері аяқталмай келеді.
— «Сити палас» көпфункционалды сауда және ойын-сауық орталығының аяқталмаған құрылыс нысаны сатылады. Құрылыс-монтаж жұмыстары жүріп жатқан жоқ, — делінген хабарлама жарияланды krisha.kz сайтында.
Осылайша сауда және ойын-сауық орталығы 13 500 000 000 теңгеге бағаланып отыр. Дегенмен жылжымайтын мүлік нарығында қолданыстағы бағаға байланысты құны өзгеруі мүмкін екендігі айтылған.
Сондай-ақ, хабарландыруда нысан құрылысының қолданысқа қаншалықты дайын екендігі пайызбен көрсетілген. Оның ішінде іргетасы — 100%, қабырғалары — 100%, шатыры — 20-30%, едені -100%, ішкі бөліктері — 90%, сыртқы әрлеуі — 85%, ішкі инженерлік желілері — 20%, абаттандыру — 40%-ға дайын.
Еске сала кетсек, 2023 қыркүйекте елорда әкімдігінің баспасөз қызметі банктік инвестициялар бойынша ауыртпалықтарға байланысты (Jusan Bank) аталған сауда, ойын-сауық орталығы құрылысының тоқтатылғанын хабарлаған еді.
Кейіннен Астана әкімі Жеңіс Қасымбек «сақалды құрылысқа» айналған Сити палас кешенінің иесін табуға уәде берді.
Былтыр «Сити Палас» сауда-ойын-сауық орталығының меншік иесі ауысқанын жаздық.
