Елордада «Президенттік институт: Қазақстандық модель» атты халықаралық конференция өтуде
«Жыл сайын Президент күні қарсаңында өтіп келе жатқан бұл конференция бүгінде Тәуелсіз Қазақстан туралы халықаралық деңгейде диалог құратын ерекше форумға айналды. Осы бағытта биылғы конференцияның маңызы да зор, орны да ерекше. Себебі алдағы жылы біздің елімізде президенттік басқару институтының құрылғанына тура 30 жыл толады. Бұл біздің егемен еліміз үшін айтулы белес және тарихи кезең. Осы 30 жылда барлық реформалар жоғары деңгейде орындалып, біздің Қазақстанымыз аз уақыттың ішінде саяси, экономикалық және әлеуметтік табысты елге айналды. Бұл Тәуелсіз Қазақстанның негізін қалаушы, Тұңғыш Президентіміз - Елбасы Нұрсұлтан Назарбаевтың көреген саясатының, батыл қадамының және бірлігі жарасқан халқымыздың ерен еңбегінің жемісі екендігі сөзсіз», - деді концеренция жұмысын ашқан Мәжіліс Төрағасы Нұрлан Нығматулин.
Сонымен қатар ол бүгінде Елбасының бастамаларын Мемлекет басшысы Қасым-Жомарт Тоқаев жалғастырып, еліміздің стратегиялық жоспарларын әрі қарай жүзеге асырып келе жатқанын айтты.
«Сондықтан бүгінгі конференцияда қалыптасқан Қазақстанның даму жолының ерекшеліктері жан-жақты талқыланып, ұсыныс-пікірлер айтылатын болады. Осы конференция жұмысына сәттілік және табыс тілеймін», - деді Мәжіліс төрағасы.
Айта кетейік, конференция жұмысына ҚР Парламенті Сенаты мен Мәжілісінің депутаттары, Әзербайжан, Болгария, Түркия, Татарстан, Қырғызстан, Моңғолия, Сербия, Франция парламентарийлерінің өкілдері қатысуда.