Елордада ішінде бала болған лифт үзіліп кетті

АСТАНА. KAZINFORM – Астанада лифтінің істен шығу фактісі тіркелді. 

Төтенше жағдай елорданың М. Төлебаев көшесіндегі көпқабатты тұрғын үйде тіркелген. Ақпаратта айтылғандай, лифтінің ішінде қыз бала болған. 

Баланың қазіргі жағдайын қалалық қоғамдық денсаулық сақтау басқармасынан сұраған едік.

— Ата-анасы баласын № 2 көпсалалы балалар ауруханасына апарған. Бейінді мамандар амбулаториялық тексеру жүргізді. Ауыр жарақат болмағандықтан, ауруханаға жатқызу қажет болмады, сондықтан бала амбулаториялық ем алуға жіберілді. Одан арғы емдеу тұрғылықты жері бойынша жүргізіледі, — деген хабар алдық басқарманың баспасөз қызметінен.

Айта кетейік, ел аумағында лифтінің кенеттен істен шығу фактілері жиі болып тұрады. Биыл мамырда Қызылордада лифт ішінде қалып қойған адамдар құтқарылды. 
Сондай-ақ өскемендіктер лифтілердің жиі сынатынына шағымданды. 

Одан бөлек Ақтөбеде лифт істемейтін үйдің кей тұрғындары айлап дала көрмейтінін жазған едік. 

Еске салайық, елімізде тағам, жанармай, лифтіге қатысты техникалық регламент қайта қаралады.