Елордада сүйек ою шеберлерінің халықаралық фестивалі өтіп жатыр
АСТАНА. KAZINFORM – Астанадағы «Русский дом» үйінде халықаралық «Сказ на бивне мамонта» фестивалінің салтанатты ашылуы өтті.
Аталған іс-шараға Қазақстаннан, Қытайдан және Ресейдің жиырма өңірінен келген ең үздік сүйек ою шеберлері мен қолөнершілері қатысты.
Фестивальді Саха Республикасы (Якутия) Мәдениет және рухани даму министрі Афанасий Ноев салтанатты түрде ашты. Оның айтуынша, осы секілді жобалар әлемнің түкпір-түкпіріндегі адамдарды біріктіреді.
Өңіраралық ынтымақтастықтың одан әрі дамуын Ресейдің Қазақстандағы «Россотрудничество» өкілдігінің басшысы Ольга Филонова да қолдады.
– Бұл шараның орыс үйінде өтуі, біз үшін ерекше қуаныш. Ресей жері таланттарға бай, бірақ қазақстандық шеберлер де таңғалдыруда. Сондықтан үздік сүйек ою шеберлерінің жұмыстарын көрсетіп қана қоймай, тәжірибе алмасуы өте маңызды. Біз осындай жобаларды барынша қолдауға дайынбыз, - дейді ол.
Қолөнер шарасы Саха Республикасының (Якутия) «Уус» халықтық қолөнер және кәсіпшілік қорының бастамасымен және Президенттік мәдени бастамалар қорының қолдауымен ұйымдастырылды.
– Бұл фестиваль — ата-бабамыздың дәстүріне деген құрмет. Олардың алтын қолы сүйекті өнер туындысына айналдырған. Біз бұл дәстүрді жалғастырып, шеберлер мен өнер сүйер қауымды біріктіреміз, - деді «Уус» қорының директоры Яна Игнатьева.
Ұйымдастырушылардың айтуынша, көрмеге келген әрбір адам сүйек ою шеберлігі өнеріне, ата-бабалар мұрасына жақындап, қолөнер шеберлігі сұлулығына тәнті бола алады.
Саха, Бурятия, Калмыкия, Тыва республикаларынан, сондай-ақ Түмен, Магадан, Ярославль, Мәскеу облыстарынан, Чукотка автономды округі және басқа да өңірлерден әкелінген қолөнер туындыларын 23 наурызға дейін елордадағы орыс үйінде (Русский дом) тамашалауға болады.
Сондай-ақ 21 және 22 наурыз күндері бірегей экспонаттар «EXPO» халықаралық көрме орталығының павильонында да баршаға ұсынылады.
