Елордадағы мемлекеттік балабақшаларда ата-ана төлемақысы өседі

АСТАНА. ҚазАқпарат – Елорданың білім басқармасы «2023 жылға арналған Астана қаласының мектепке дейінгі ұйымдарында мектепке дейінгі тәрбие мен оқытуға мемлекеттік білім беру тапсырысын, ата-ана төлемақысының мөлшерін бекіту туралы» қаулысының жобасын әзірледі, деп хабарлайды ҚазАқпарат тілшісі.

«Тауарлар мен қызметтерге бағаның өсуі нәтижесінде мемлекеттік балабақшалардағы ата-аналардың тамақтану ақысының құны тамақтануды ұйымдастыру шығындарын өтемейді», - делінген Ашық НҚА порталында жарияланған құжатта.

Әкімдік қаулысына сай, мектепке дейiнгi мемлекеттік білім беру ұйымдарында ата-ана төлемақысы мына мөлшерге қымбаттайды:

- жалпы білім беретін мектепке дейінгі ұйымдар үшін - 41 718 теңгеден 46 189 теңге дейін;

- балалардың толық күндік шағын орталығы - 31 995 теңгеден 46 189 теңгеге дейін;

- арнайы мектепке дейінгі ұйымдар, жалпы білім беретін мектепке дейінгі ұйымдардағы арнайы және инклюзивті топтар үшін - 91 118 теңгеден 102 665 теңгеге дейін;

- мектепке дейінгі санаторлық ұйымдар үшін - 62 040 теңгеден 89 204 теңгеге дейін;

- балалардың толық емес күндік топтары үшін - 18 066 теңгеден 20 202 теңгеге дейін;

- мемлекеттік мектепке дейінгі ұйымдарда тамақтанғаны үшін ақы төлеу - 16 800 теңгеден 20 800 теңгеге дейін.

Құжат 3 маусымға дейін көпшілік талқылауда болады. Кейін осы айдан бастап қолданысқа енгізіледі.