Елордалық дәрігерлер терезеден құлаған сәбидің жағдайы туралы мәлімет берді

АСТАНА. KAZINFORM – Кеше бір жасар астаналық сәби терезеден құлап кеткен еді. Қоғамдық денсаулық сақтау басқармасы баланың қазіргі жағдайына қатысты мәлімдеме жасады.

5 тамызда жедел жәрдем қызметкерлері Б.Момышұлы, 11 мекенжайында 2-ші қабаттағы терезеден құлаған сәбиді (2023 жылы туған) №2 көпсалалы қалалық балалар ауруханасына жеткізген.

«Сәби травматолог, нейрохирург, хирург және реаниматолог дәрігерлердің қарауынан өтті. Баланың басы және кеуде қуысының жұмсақ тіндері көгеріп жарақаттанған. Жедел хирургиялық және травматологиялық патологиялардың болмауына байланысты бала амбулаториялық ем қабылдауға жіберіліп, қажетті ұсыныстар берілді», - дейді қалалық басқармадан.

Елордада бір жасар бүлдіршін терезеден құлап, ауруханаға жеткізілгені туралы хабарлаған едік.

Еске сала кетсек, Төтенше жағдайлар министрлігінің шілдедегі мәліметі бойынша, жыл басынан бері 100-ден астам бала терезеден құлап кеткен.