Елордалық спортшылар Францияда көркем жүзуден өткен Әлем Кубогында алтын медаль алды
АСТАНА. KAZINFORM – Франция астанасы Парижде көркем жүзуден жылдың алғашқы Әлем Кубогы өз мәресіне жетті. Бұл туралы елорда әкімдігінің ресми сайты жазды.
Бұл беделді жарыста Астана қаласының спортшылары жасөспірімдер арасындағы командалық еркін бағдарлама бойынша жоғары нәтиже көрсетіп, алтын медаль иеленді. Команда сапында Ирина Говорухина, Ирада Исламова, Ясмина Исламова, Мақпал Калмурзаева, Альбина Өмірсерікқызы мен Алдияр Рамазанов өнер көрсетті.
Осыған дейін де Астана спортшылары жарыста жоғары нәтиже көрсетіп, жекелеген бағдарламаларда жүлделі орындарға ие болды. Артур Майданов пен Валерия Столбунова жұбы, сондай-ақ Эдуард Ким тамаша өнер көрсетіп, күміс медаль еншіледі.
Байрақты бәсекеге әлемнің 22 елінен 167 спортшы қатысты.
Бұған дейін хабарланғандай, астаналық жас хоккейшілер Канаданың Квебек қаласындағы беделді турнирде күміс жүлде қанжығалаған болатын.
