Елордалық 8 мектепте эксперименталды сыныптарда 100 оқушы білім алуда
АСТАНА. ҚазАқпарат - Елордалық 8 мектепте эксперименталды сыныптарда 100 оқушы білім алуда. Бұл туралы «12 жылдық мектеп тәжірибесі: 10 жылдың қорытындысы» тақырыбында өткен Қазақстан Республикасының Білім және ғылым вице-министрі Есенғазы Иманғалиевтің 12 жылдық білім беру бойынша эксперименталды мектептердің оқушыларымен кездесуінде мәлім болды.
Кездесуге 140 адам қатысты, соның ішінде эксперименталды мектеп басшылығы, кураторлар, оқушылар. Бұл туралы astana.kz сайтына қалалық Білім басқармасынан хабарлады.
Вице-министр Есенғазы Иманғалиевтің айтуынша, 12 жылдық білім беру тәжірибесі республикамызда 2003 жылы қолға алынды, ал биыл елордалық 8 мектепте 9-11 эксперименталды сыныпта 101 оқушы оқып жатыр.
Кездесу аясында көрме ұйымдастырылып, көпшіліктің назарына 2003-2014 оқу жылдарындағы Астана қаласының эксперименталды мектептерінің қызметін көрсететін баннерлер, стендтер, тәжірибеші мұғалімдердің шығармашылық жұмыстары ұсынылды. Бұдан басқа, №3,4,32 мектептердің оқушылары өз өнерлерін ортаға салды, «Көгілдір желкен» балабақша - гимназиясының оқытушылары мен эксперименталды сынып оқушыларының «Менің таңдауым - болашақ білімі» атты экскурсы өткізілді.
Сондай-ақ, «Бос микрофон» шарасы ұйымдастырылып, оқушылар 12 жылдық білім беру бойынша өздерін қызықтырған сұрақтарын қойды. Кездесу соңында ҚР Білім және ғылым вице-министріне елордалық мектептердің эксперименталды сыныптарының оқушылары әзірлеген «Бірлескен шығармашылық» хартиясын табыстады.
