Ембі полигоны аумағы ауыл шаруашылығы мақсатында пайдаланылады

АСТАНА. ҚазАқпарат - Бүгін ҚР Парламенті Мәжілісінің жалпы отырысында палата депутаттары «1995 жылғы 20 қаңтардағы ҚР мен РФ арасындағы Ембі полигонын пайдалану және жалға беру шарттары туралы келісімінің және 1996 жылғы 18 қазандағы Қазақстан Үкіметі мен Ресей Үкіметі арасындағы Ембі сынақ полигонын жалдау туралы шарттың қолданысын тоқтату жөніндегі шаралар туралы ҚР мен РФ арасындағы хаттаманы ратификациялау туралы» заң жобасын мақұлдады, деп хабарлайды ҚазАқпарат.

«Хаттамаға 2016 жылғы 20 қазанда Мәскеуде қол қойылды. Құжатта Ембі сынақ полигонын жалдау және пайдалану тәртібін реттейтін халықаралық шарттардың қолданысы тоқтатылады. Сондай-ақ Ресейге уақытша пайдалануға берілген жер телімдерін, жылжымалы немесе жылжымайтын мүліктерді қабылдау жөніндегі қажетті шараларды жүргізу көзделген», - деді ҚР Қорғаныс министрінің орынбасары Талғат Мұхтаров заң жобасы бойынша баяндамасында.

Оның сөзіне қарағанда, полигонның жер учаскелері ары қарай пайдалану үшін жарамды жағдайда қайтарылады. Ресей тарапынан полигонды пайдалану бойынша тиісті міндеттерін орындауына қатысты шағымдар жоқ.

«Полигонды жалдаудан шығару аймақтық экономикалық дамуға қолайлы әсер етеді деп есептейміз. Оның ішінде қайтарылған жерлерде ары қарай пайдалы қазбаларды барлау, ауыл шаруашылығымен айналысатын кәсіпкерлердің, ұйымдардың мүддесінде пайдалануға болатынын атап өту қажет. Бұдан басқа, полигонның учаскелері Ақтөбе облысындағы әлеуметтік маңызы зор инфрақұрылымдық жобалардың құрылысы үшін пайдаланылуы мүмкін», - деді Қорғаныс министрінің орынбасары.

Т. Мұхтаров аталған полигон ядролық сынақ алаңы санатына жатпайтынын, сондықтан да тұрғындар мен жергілікті билік органдары тарапына қандай да бір аурулардың туындауына байланысты шағымдар түспегенін атап өтті.