«Еңбек» бағдарламасы: Қостанайда 700-ге жуық жұмыс орны ашылды
Қостанай өңірінде ауылдық елді мекендердегі тұрғындарды қолдауға ерекше мән берілді. Оған өңірлердегі мемлекеттік бағдарламалардың орындалуы дәлел.
Биыл «Еңбек» бағдарламасы бойынша 540 шағын және орта бизнес субъектісіне 2,1 млрд теңге шағын несие берілді. Нәтижесінде 691 жаңа жұмыс орны құрылды.
«Қазіргі уақытта ҚР Ауыл шаруашылығы министрлігі салалық одақтармен және агробизнес өкілдерімен бірлесіп, АӨК дамытудың 2022-2026 жылдарға арналған жаңа тұжырымдамасын әзірлеуде. Оның негізгі міндеті – Мемлекет басшысының еңбек өнімділігін 2,5 есеге және өңделген өнім экспортын 2 есеге арттыру жөніндегі тапсырмасын орындау. Қостанай облысы да бұл тапсырмаларды орындауға дайын. Алдын ала жоспар құрылып, әр аудан-қала АӨК-ті дамыту бағдарламасының іске асырылуына жауапты болады. Қазірдің өзінде аймақта 308 стартап жоба бар. Олардың ауқымдылары іріктеліп, кешенді жобалар тізіміне енеді», - дейді ауыл шаруашылығы және жер қатынастары басқармасының басшысы Тимур Бисимбаев.
Бұдан бөлек, ауыл шаруашылығы басқармасы аудан әкімдіктерімен бірлесіп, 2021 жылғы егіс алқаптарын әртараптандыру бойынша жұмыс жүргізуде.
Атап айтқанда, облыс шаруалары қарақұмық, күнбағыс майы, картоп және көкөністер өсіру үшін арнайы алқаптарға ие болады.
Алаңдарды бөлуді ауыл шаруашылығы басқармасы іске асырады.