Еңбек қауіпсіздігі мамандарын даярлайтын оқу орталығы ашылады

АСТАНА. KAZINFORM – Елімізде Халықаралық еңбек ұйымының жобалық кеңсесі жұмысын бастады. Бұл туралы ҚР Еңбек және халықты әлеуметтік қорғау министрі Светлана Жақыпова айтты.

— Қазақстанға былтыр алғаш рет Халықаралық Еңбек Ұйымының (ХЕҰ) Бас директоры ресми сапармен келді. Соның нәтижесінде Қазақстанда биыл жобалық кеңсе (Халықаралық еңбек ұйымының офисі – ред.) ашылып, жұмысын бастады, - деді ол Үкімет отырысында. 

Сондай-ақ ведомство басшысы еңбек қауіпсіздігі мамандарын өз елімізде даярлайтын оқу орталығы ашылатынын айтты. 

- Еңбек ресурстарын дамыту орталығы базасында Халықаралық еңбек ұйымының Туриндік оқу орталығының филиалын ашу бағытында белсенді жұмыс жүргізіп жатырмыз, - деді Светлана Жақыпова. 

Министрдің айтуынша, бұл орталық мынандай:

- шетелге шығуды қажет етпестен еңбек қауіпсіздігі мамандарын жүйелі және сапалы дайындауды ұйымдастыру;

- халықаралық озық тәжірибені ескере отырып ұлттық кадрлардың біліктілігін арттыру;

- әлеуметтік әріптестер, мемлекеттік органдар және халықаралық ұйымдар арасындағы институционалдық байланыстарды нығайту;

- Орталық Азияда еңбек қорғау саласындағы аймақтық құзырет орталығы ретінде Қазақстанның рөлін күшейту сынды мүмкіндіктерге жол ашады.

Айта кетейік, Қазақстанға еңбек мигранттары ең көп келетін 4 ел белгілі болды.