Еңбек кодексіне еңбек қауіпсіздігін сақтамаған кәсіпорынның жұмысын ішінара тоқтататын норма енгізіледі
АСТАНА. KAZINFORM – Еңбек және халықты әлеуметтік қорғау министрі Светлана Жақыпова өндірістегі еңбек қауіпсіздігін мобильдік қосымша арқылы қадағалау тетігін енгізуді ұсынды.
- Біз былтыр мобильдік қосымша әзірлегенбіз. Төтенше жағдайлар министрлігіне сол қосымшаны жұмыс орындарын тестілейтін мамандандырылған ұйымдардың жұмысына енгізуді ұсынып отырмыз. Қазір ол ұйымдар аналогтық құрылғылармен жұмыс істеп жүр. Яғни, атмосфераның қысымы, газдың үлесі, дыбыс толқындары мен діріл деңгейі сияқты жұмыс орнының қауіпсіздік дәрежесінен хабар беретін көрсеткіштердің бәрі цифрлық форматта өлшенуі керек. Ол көрсеткіштер мобильді қосымша арқылы Еңбек және халықты әлеуметтік қорғау, Төтенше жағдайлар министрліктеріне түсіп, онлайн режимде жасанды зейіннің көмегімен өңделуі керек. Өңделген мәлімет негізінде тәуекел аймағы айқындалып, өндіріс дереу уақытша тоқтатылу керек, - деді ол Сенаттағы парламенттік талқылауда.
Айтуынша, аталған норма Еңбек кодексіне енгізілмек.
- Әріптестер бұл бағыттағы цифрлық технологияларды қолдаса, Еңбек кодексіне мемлекеттік инспекцияға өндірістің қауіпті аймағындағы жұмысты тоқтату құзыретін беретін норма енгіземіз. Қазір еңбек қауіпсіздігі тұтас кәсіпорын бойынша бағаланатын болса, біз ұсынатын интегралды бағалау әр жұмыс орнының қауіпсіздігін қадағалайды, - деді министр.
Еске салсақ, Президент Ұлытау облысының «Жомарт» шахтасындағы апаттан кейін Үкіметке өнеркәсіптік қауіпсіздік нормаларының сақталуын тексеруді тапсырған.
