Enbek порталында электрондық ұжымдық шарт жасалуы мүмкін

АСТАНА. KAZINFORM – HR Enbek еңбек ресурстары порталында жұмыс беруші мен кәсіподақ ұйымы арасында электрондық ұжымдық шартты (бұдан әрі – ЭҰШ) жасасу мүмкіндігі бар.

Кәсіподақ өкілі порталдағы жеке кабинетте ұжымдық шарт жобасын жасайды және оны жұмыс берушіге келісу үшін жібереді. Жұмыс беруші ЭҰШ жобасын бекіткен кезде ол еңбек заңнамасының сақталуын тексеру үшін автоматты түрде мемлекеттік еңбек инспекторының жеке кабинетіне жіберіледі.

Мемлекеттік инспектор бекіткеннен кейін құжатқа жұмыс беруші қол қоя алады.

- Пайдаланушыларға ыңғайлы болу үшін жүйе ЭҰШ-пен жұмыстың барлық кезеңдерінде: жобаға қол қойғанда, оны қайта қарауға жіберген кезде, мемлекеттік еңбек инспекторы құжатты қабылдағаннан немесе қабылдамағаннан кейін автоматты түрде жұмыс берушіге және кәсіподақ ұйымына хабарламалар жібереді, - деп түсіндірді Еңбек және халықты әлеуметтік қорғау министрлігінен.

Қол қойылған ЭҰШ кәсіподақ үшін де, жұмыс беруші үшін де көруге және жүктеп алуға қолжетімді болады. Оның түпнұсқалығын электронды құжатта орналастырылған QR коды арқылы тексеруге мүмкіндік бар.

Ұжымдық шарттардың электрондық форматын енгізу еңбек қатынастарының заңдылығы мен ашықтығын арттыруға, жұмыс берушінің қабылдаған міндеттемелердің орындалуына бақылауды қамтамасыз етуге, жұмыс орындарының сапасын бақылауға ықпал етеді.

Айта кетейік, осы уақытқа дейін жұмыспен қамтылғандардың ең көп үлесі қай салада екенін талдап жазғанбыз.