Енді көлік инфрақұрылымы қарызына мемлекеттік кепілдік беріледі
АСТАНА. KAZINFORM – Биыл көлік инфрақұрылымы қарызына берілетін мемлекеттік кепілдік көлемі 1,9 трлн теңгеге ұлғаяды. Бұл туралы Үкімет басшысының орынбасары Серік Жұманғарин мәлім етті.
— Үкімет елдің көлік инфрақұрылымын жақсарту үшін қарыз алуға да мемлекеттік кепілдіктер береді, бұл отандық тауарлар мен қызметтерге сұранысты арттырып, экономиканың өсу қарқынын жеделдетеді. Аталған бастама алдағы уақытта транзиттік тасымалдардың, ел ішіндегі тасымалдардың көлемін ұлғайтып, іскерлік белсенділіктің өсуіне ықпал етеді. Биыл мемлекеттік кепілдіктер 1,9 трлн теңгеге ұлғаяды, бұл 13,1 мың шақырымға дейін автомобиль және 585 шақырымға дейін темір жолды жөндеу мен салуға жұмсалады, — деді Серік Жұманғарин Үкімет отырысында.
Вице-премьердің мәлімдеуінше, биыл энергетикалық және коммуналдық секторларды жаңғырту жөніндегі ұлттық жобаны іске асыру аясында салаға құйылатын инвестиция көлемі артады.
— Ұлттық жоба шеңберіндегі инвестициялар көлемі 5 жылда 13 трлн теңгеден асады, оның ішінде инфрақұрылымды жаңғыртуға салынған инвестиция шамамен 1,2 трлн теңгеге жетеді. Ұлттық жоба инвестицияның өсуіне, сондай-ақ жаңа отандық тауарлар мен елдің коммуналдық инфрақұрылымын салу кезінде өнімдері сатып алынатын өндірушілердің пайда болуына ықпал етеді, — дейді ол.
Сондай-ақ Үкімет басшысының орынбасары ұлттық жобаны іске асыру инфрақұрылымның тозуын азайтуға, табиғи монополиялар субъектілерінің операциялық тиімділігінің өсуіне және электр энергиясы мен жылу беруде ысырапты азайтуға ықпал етеді.
- Энергетикалық және коммуналдық инфрақұрылымды жаңғырту және салу шеңберінде елішілік құндылық үлесін ұлғайту үшін отандық өндіріс тауарларын пайдалануға ынталандыру бойынша жұмыс жүргізіледі. Бұл тәсіл ішкі бәсекеге қабілеттілікті арттырып қана қоймай, жаңа жұмыс орындарын құруға, импортқа тәуелділікті төмендетуге, сондай-ақ отандық өндіріс көлемін ұлғайтуға мүмкіндік береді, — деп толықтырды Серік Жұманғарин Үкімет үйінде.
Айта кетейік, Қазақстанда шағын, орта және ірі бизнес кредитке кепілдік беретін бірнеше қор құрылмақ.
