Енем де ат құлағында ойнайтын шабандоз болған, сондықтан қолдап отырады — блогер Асыл Ахметова
ПЕТРОПАВЛ. KAZINFORM — Ауылдағы өмірді бүкпесіз жариялап, әлеуметтік желіде жылқышы қыз ретінде танылған Асыл Ахметова қазір Солтүстік Қазақстан облысы Лобаново елді мекенінде ұстаз болып еңбек етеді. Өмірге құштар бойжеткен биыл тұрмыс құрды. Енді жолдасымен бірге ауыл балаларына ұлттық ойындарды — садақ атуды, соның ішінде жамбы атуды үйретіп жатыр. Әлеуметтік желіде де белсенді, ұлттық болмысымызды насихаттап келеді.
— Асыл, әлеуметтік желіге қалай келдіңіз? Алғашқы танымалдылық қай кезде, қай жазбаңыздан кейін келді?
— Қателеспесем 2020 жыл болатын, TikTok желісі қарқынды дамып келе жатты. Бірде үйдің шаруасын істеп жүріп, видео түсіріп, әлеуметтік желіге сала бастадым. Жазбаларыма жұрттың қызығушылығын байқадым. Кейін мініп жүрген жылқыммен бір видео түсірдім. Сол бейнежазба көбіне ұнады. Шөп, су тасып жүрген бейнежазбаларым болды, ауыл өмірін шынайы көрсетуге тырыстым, соларды көріп оқырмандарым жаза бастады.
— Жылқышының қызы болғандықтан аттың құлағында ойнайсыз ба, әлде басқа себебі бар ма? Жалпы неше жасыңызда атқа отырдыңыз?
— Негізі бес жасымда атқа отырдым. Әкем жанынан қалдырмай өзімен бірге ертіп жүрді. Сол кезден қызығушылығым, жылқы малына деген сүйіспеншілігім оянды. Мектепте оқып жүргенде кейде әкемнің орнына мал бағуға баратынмын.
— Блогерліктен басқа тағы қандай хоббиіңіз бар? Садақ атасыз, ән айтасыз, мотоцикл жүргізесіз — біз білмейтін тағы қандай қырларыңыз бар?
— Оқырмандарымнан құпиям жоқ, олар барлық қырымды біледі. Өйткені бар білетініммен бөліскім келеді әлеуметтік желіде, сондықтан басқа жасырып жүрген талантым жоқ. Сахнада ән айту бала кезден арманым еді, қазір хоббиге айналды. Ауданда бір іс-шаралар болған жағдайда шақырады, сол кезде ән айтамын.
— Блогерлік негізгі қызметіңізге кедергі келтірмей ме? Бірде Астанада, енді бірде Алматыда жүресіз. Оқушыларыңыз жалпы сіздің танымалдығыңызды қалай қабылдайды?
— Ұлттық өнерді, ұлттық спортты насихаттап, балалардың қызығушылығын оятуымыз керек. Бұл біздің бір миссиямыз деп білемін. Балалар естігеннен гөрі, көргенін тез жадында сақтайды. Үлгі болып, қызығушылық тудыру — мақсатым.
Түрлі форумдарға, республикалық іс-шараларға шақырту алған кезде жұмыстан сұрануға тура келеді. Кейін балалармен сабақты қуып жетуіміз керек. Бірақ кедергіден гөрі менің танымалдылығымның оң әсері бар деп ойлаймын. Әріптестерім болсын, оқушылар болсын үнемі қолдап тұрады.
— Қазір 68 мың оқырманыңыз бар екен. Сізді негізінен кім оқиды?
— Көбіне өзіміздің Солтүстік өңірдің тұрғындары оқиды. Сосын Алматы мен Астанадан оқырмандарым басым. Жасына келер болсақ — 18 бен 25 жас аралығында.
Шетелден жазады, «Қазақстанға келіп, көргіміз келеді» деп. Алдында Даниядан келген қызды күтіп алдық. Көшпенділер ойындары біздің ауылдан Ұлы дала жорығымен басталғаннан кейін шетелдіктер көп келді, олармен таныстық, салтымыз бен мәдениетімізді көрсеттік.
— Осы Көшпенділер ойынын біздің елде өткізуді кезінде сіз ұсынған екенсіз. Дүбірлі дода көңіліңізден шықты ма?
— Осыдан екі жыл бұрын Зерендіде өткен форумда Көшпенділер ойынын бізде өткізу туралы идеяны айтқан едім, сол кезде жоғары деңгейде өткізе аламыз ба деген ой болды. 2024 жылға дейін үлгереміз бе, қай қалада өтеді деген сұрақтар мазалады. Астана мен Түркістан қалаларының арасында таңдау тұрды. Маған бәрі ұнады. Ашылуында да болдым, барлығы қазақ тілінде өтті. Алғаш рет ұйымдастырылғандықтан мүмкін кемшіліктер болған шығар, бірақ өзім байқамадым. Ең бастысы — Қазақстанымызды көптеген елдер көрді, қонақтардың бәріне ұнады.
@assylym21 Өзіме осы ән ұнайды🥰 #рек ♬ оригинальный звук — Керей қыз🐎
— Тұрмыс құрғаныңызды білеміз. Отбасылық өмірге байланысты бұрынғы өмір сүру салтыңызды өзгерту ойыңызда жоқ па?
— Жолдасым мені осы істе қолдайды. Ол да жылқы малын жақсы көреді, көкпар ойнайды. Қазір екеуміз бірге садақ ату үйірмесін ашып жатырмыз. Мемлекеттен да, жергілікті атқарушы биліктен де, мектебімнен де қолдау бар. Жамбы атуды, аударыспақ ойынын үйретеміз, балалар бос жүрмесін деген мақсат. Енем де ат құлағында ойнайды, кезінде қыз қуу ойындарына қатысқан. Сондықтан мені ол да үнемі қолдайды. Кейбір іс-шараларға бармаймын десем, керісінше қатысқанымды тілеп, айтып отырады.
— Бір бейнежазбада шауып келе жатқан аттың үстінде тік тұрғаныңызды көрдім, мұндай қауіпті жаттығуларды жасауға қорықпайсыз ба?
— Атқа әр мінген сайын қорқамын. Не дегенмен жануар ғой, үркуі мүмкін, сондықтан сақ отыру қажет. Тазым бар, лайка тұқымдас «Мойнақ» атты итім бар. Жалпы жан-жануарды жақсы көремін.
— Бір сұхбатта өз шаруашылығымды құрғым келеді деген екенсіз, жалпы қандай арманыңыз бар?
— Қазір көпшілік өзі ұнатқан кәсібін ашып жатыр. Мен де өз шаруашылығымның болғанын қалаймын. Ұлттық спорт, соның ішінде жылқымен байланысты спортқа кеткім келеді. Жылқы малын көбейтіп, шәкірт тәрбиелеу ойымда бар. Қазір оқушыларға арнап үш жылқы ұстап отырмыз. Қазір мен мектептен бөлік колледжде де еңбек етемін. Осы колледжде басқа ауданнан, өңірлерден келген балалар оқиды. Қазақстанның батысынан көп. Оқушылардың да, студенттердің де қазақы өнерге қызығушылығы жоғары. Үйренем, атқа отырамын деген баланың бетін қақпай, бәрін үйірмеге алып жатырмыз. Бұйыртса жарыстарға шығу да жоспарымызда бар.
