Энергетика министрі: биыл төртінші мұнай өңдеу зауыты бойынша нақты шешім болады
АСТАНА. KAZINFORM – Қазір төртінші мұнай өңдеу зауыты салынатын өңірлер зерттеліп жатыр. Бұл туралы Энергетика министрі Ерлан Ақкенженов айтты.
Бүгін Үкімет отырысынан кейінгі баспасөз мәслихатында Қазақстанда төртінші мұнай өңдеу зауытын салу жоспарына қатысты сұрақ қойылды.
- Осы сұраққа нақты жауап беремін. Атап айтқанда, төртінші зауыт іске асырылады. Қазіргі таңда техникалық-экономикалық негіздемелер пысықталып жатыр. Әсіресе, «Самұрық-Қазына» қоры осы бағытта жұмысын жүргізіп жатыр. Осы жылдың аяғына дейін нақты шешім қабылданады, - деді Е.Ақкенженов.
Оның айтуынша, қазір зауыт салынатын орынды таңдауға қатысты талқылау жүріп жатыр. Бұл тұрғыда Маңғыстау, Атырау, Ұлытау облыстарындағы, сондай-ақ елдің оңтүстік өңіріндегі алаңдар зерттеліп жатыр.
- Бұл бағытта электр энергиясы мен сумен қамтамасыз ету көздері, сондай-ақ басқа қажеттіліктердің бәрі назарға алынады. Негізі, осы жобаны іске асыру үшін 3 немесе 4 жыл керек. Техникалық-экономикалық негіздеме және жобалық құжаттамаларды, құрылыс жұмыстарын жүргізуді ескере отырып, 4 жылдың шамасында іске асырылады, - деді министр.
Бұған дейін төртінші мұнай өңдеу зауытын салуға 10 млрд доллар жұмсалуы мүмкін екені айтылған еді.
