ЕО Трамптың кедендік баждарына қарсы шаралар қабылдауы мүмкін екенін мәлімдеді
АСТАНА. KAZINFORM — АҚШ-тың Еуропалық одақтан әкелінетін тауарларға 30 пайыздық баж салығын енгізу жоспарына еуропалық шенеуніктер мен саясаткерлер қарсы пікір білдірді. Германия өнеркәсіпшілері Ақ үймен келісімге келуге шақырды, деп хабарлайды dw.com.
Еурокомиссия АҚШ енгізгелі отырған баждарға байланысты Еуроодақ мүддесін қорғайтынын мәлімдеді.
— ЕО-дан келетін экспортқа 30 пайыздық баж енгізу трансатлантикалық жеткізу тізбектерін бұзады, бұл екі жағалаудағы кәсіпорындарға, тұтынушыларға және науқастарға зиян тигізеді, — деді Еурокомиссия төрағасы Урсула фон дер Ляйен.
Оның бұл пікірін Reuters агенттігі келтірген. Дональд Трамптың ЕО тауарларына 1 тамыздан бастап баж енгізу шешімі осылай бағаланды.
Фон дер Ляйен Брюссельдің АҚШ-пен келісімге келу үшін 1 тамызға дейін жұмыс істеуге дайын екенін айтты.
— Біз Еуроодақтың мүдделерін қорғау үшін қажет болған жағдайда лайықты жауаптық шараларды қабылдауға дайынбыз, — деді ол.
АҚШ экс-президенті Дональд Трамп, өз кезегінде, егер ЕО америкалық тауарларға бажды көтерсе, Вашингтон да симметриялы жауап қайтаратынын мәлімдеген.
Еуропалық кеңес төрағасы Антониу Кошта да Трамптың шешіміне байланысты Еуроодақтың «біртұтас» күйінде қалатынын және өз мүдделерін «қорғауға дайын» екенін айтты.
— Баж салықтары — бұл салықтың бір түрі. Олар инфляцияны күшейтеді, белгісіздік туғызып, экономикалық өсімді тежейді. Біз әлем бойынша сенімді сауда серіктестіктерін құруды жалғастырамыз, — деді Кошта (Reuters).
«Біз барлық тараптың келісімге келуге деген ниетіне сенеміз. Батыс әлемін тұтастай нығайтатын әділ келісім қажет. Қазіргі жағдайда Атлантика жағалауындағы екі тараптың арасында сауда соғысын қоздыру орынсыз. Қазір басты назар келіссөздерге бағытталуы керек», — деді Италия премьер-министрі Джорджа Мелони.
Нидерланд премьері Дик Схоф Трамптың бұл бастамасын «алаңдатарлық әрі болашаққа апармайтын қадам» деп бағалады.
— Еурокомиссия бізден толық қолдау күтсе болады. Біз ЕО ретінде бірлік пен табандылық танытып, АҚШ-пен өзара тиімді нәтижеге жетуге ұмтылуымыз керек, — деді ол.
Ирландияның сыртқы істер және сауда министрі Саймон Харрис те ЕО-ны бірлік сақтап, АҚШ-пен келіссөзге шоғырлануға шақырды.
— Ахуалды шиеленістіріп, ЕО-ға қарсы қосымша баждарды көтеруге жол бермеу керек, — деді ол.
Германия өнеркәсіпшілерінің федералдық одағы (BDI) Германия үкіметін, Еурокомиссия мен АҚШ әкімшілігін «мәселені тез арада шешу үшін объективті диалог жүргізуге және шиеленісті ушықтырмауға» шақырды.
— Президент Трамптың бұл мәлімдемесі екі жағалаудағы өнеркәсіпке үлкен қауіп төндіретін белгі, — деді BDI басқарма мүшесі Вольфганг Нидермарк.
Германия автокөлік өнеркәсібі қауымдастығы (VDA) Трамптың жаңа шешімдері автокөлік өндірушілері мен жеткізушілерінің шығындарын арттыратынын ескертті.
— Сауда қақтығысының ушығуы алаңдатады. Бүгіннің өзінде компанияларымыздың шығындары миллиардтаған еуроны құрайды және бұл сома күн сайын өсіп келеді, — деді қауымдастық президенті Хильдегард Мюллер (Reuters келтірген).
