Эр-Риядта Ресей Федерациясы мен АҚШ делегациялары келіссөзі басталды
АСТАНА. KAZINFORM – Эр-Риядта Ресей мен АҚШ делегациялары арасында Украина жанжалын реттеу бойынша келіссөз басталды, деп хабарлайды ТАСС ақпарат агенттігі.
Аталған агенттіктің хабарлауынша, Сауд Арабиясының мемлекеттік қауіпсіздік қызметінің қызметкерлері тілшілерден қонақүй аумағынан шығуын сұраған.
Еске сала кетсек, Ресей мен АҚШ арасындағы Эр-Риядтағы келіссөзге кімдер қатысатынын жазған болатынбыз.
Онда Ресей делегациясын Федерация Кеңесінің халықаралық істер жөніндегі комитетінің төрағасы Григорий Карасин мен Федералдық қауіпсіздік қызметі директорының кеңесшісі Сергей Беседа басқаратыны хабарланды. Ал АҚШ делегациясының құрамында Мемлекеттік департаменттің саяси жоспарлау жөніндегі директоры Майкл Энтон, сондай-ақ Украина бойынша арнайы елші Кит Келлог пен Ұлттық қауіпсіздік жөніндегі кеңесші Майк Уолцтың көмекшілері болады деп күтіліп отыр.
Сондай-ақ бұған дейін Эр-Риядта АҚШ пен Украина делегацияларының келіссөзі аяқталғанын хабарлаған едік.
