Ерасыл Әубәкіровтің ісі бойынша үкім 12 қазанда шығады
Қылмыстық істі Астана қаласы қылмыстық істер бойынша ауданаралық мамандандырылған соты қарауда. Сот процесі алқабилер сотының қатысуымен өтіп жатыр.
«Алқабилер соты өздерінің шешімдерін 12 қазанда жариялайды», - делінген сот хабарламасында.
Сот алдында қылмыс жасады деген күдік тағылып отырған Нұрбек Әжімбай, Виталий Шерстенев пен Андрей Тихоненко жауап беретін болады.
Медицина университетінің студенті Ерасыл Әубәкіров 3 ақпанда із-түзсіз жоғалған. 10 ақпанда Астана қаласы ІІД қызметкерлері жедел-іздестіру шаралары барысында Е.Әубәкіровтің мәйітін тапқан болатын. Адам өлтірді деген күдікпен төрт адам - Аян Мейірбаев, Андрей Тихоненко, Виталий Шерстенев және Нұрбек Әжімбай ұсталды.
А.Мейірбаев қылмыстық істе ең басты күдіктілердің бірі болған. Бірақ кейін оған қатысты қылмыстық қудалау тоқтатылды, 7 мамырда Астана прокурорының келісімімен Аян Мейірбаев босатылды.