Ердоған 21 наурызды ресми түрде көктем мен бауырластық мерекесі деп жариялауды ұсынды

АСТАНА. KAZINFORM – Наурыз мейрамына арналған іс-шарада сөз сөйлеген Түркия президенті Режеп Тайып Ердоған 21 наурызды «көктем мен бауырластық мерекесі» етіп жариялауды ұсынып, бұл бастаманы парламентке енгізу бастамасын көтерді, деп хабарлайды Kazinform агенттігінің меншікті тілшісі.

Аталған мәлімдеме Наурызды мерекелеу аясында жасалды. Ердоғанның сөзінше, бұл көктемнің, түркі әлемінің бірлігі мен бауырластығының символы болмақ.

Түркияда Наурызға деген көзқарас бұрыннан өте күрделі және қарама-қайшылыққа толы. Ел тұрғындарының көпшілігі көктемнің бұл мерекесі туралы көп біле бермейді. Наурыз маңызды оқиға саналатын Қазақстан, Өзбекстан мен Әзербайжанға қарағанда, түркиялықтар бұл күнді мойындамайды және бұл мәселеде көптеген қиындықтар бар.

Бұл күн күрд бірлігі мен саяси күрестің символы іспеттес. 1980 жылғы төңкерістен кейін билік өкілдері Наурызды сепаратизмнің символы ретінде қабылдап, оған тыйым салуға тырысты. Содан бері мереке тек көктемгі жаңару күні ғана емес, наразылық шарасы ретінде де қабылданды. Өз кезегінде ол мемлекеттің Наурызға аса сақтықпен қарауына себеп болды.

Кейінгі кезде Түркиядағы саяси климат өзгере бастады. «Күрдістанның жұмысшы партиясының» көшбасшысы Адбулла Оджаланның қарулы күресті тоқтатып, күрдтер тұратын аудандарда бейбітшілікке ұмтылуға шақыруы Наурызға деген көзқарсты өзгертуге негіз болды.

Түркиялық журналист Мурат Йеткиннің пікірінше, Наурызды ресми мереке деп мойындау елдегі бірлікті нығайтудағы маңызды қадам болар еді.

Ол сондай-ақ бұл күн күрдтер тұратын өңірлерде ғана емес, Орталық Азия мен Иранда, Ауғанстанда да аталып өтетінін және ол мәдениет пен тарихты жалғайтын шара екенін атап өтті.

Йеткиннің пікірінше, Наурызға күрд сепаратизмінің нышаны ретінде қарау қате және саяси тұрғыдан негізсіз. Түптеп келгенде Наурыз түрік және парсыларды қоса алғанда көптеген халықтар арасында мыңдаған жылдардан бері тойланып келе жатқан мереке.

Бұл – саяси күрестің емес, табиғаттың түрленуі мен жаңаруының, ынтымақтың мерекесі.

Журналист сонымен қатар Наурыздың Түркияның ресми күнтізбесіне енуі елдегі түрлі этникалық және мәдени топтардың тату-тәтті қарым-қатынасын қалыптастырудағы маңызды қадам болатынын жеткізді.

Осыған дейін Ыстанбұл губернаторлығының әкімшілігі Экрем Имамоглу ұсталғаннан кейін наразылық акцияларына енгізілген төрт күндік тыйымның солшыл күрдтердің «Теңдік пен демократия» партиясы ұйымдастыратын Наурызға арналған шеруге әсер етпейтінін жариялаған болатын.

Кеше өзінің сөйлеген сөзінде Ердоған бұл мейрамды мәдениетпен қатар түрік мемлекеттері арасындағы байланыстарды нығайтатын маңызды элемент ретінде де атап өтті.

Ол Наурыздың барлық түрік мемлекеттері үшін бірлік күніне айналып, түрлі салалар бойынша ынтымақтастықты нығайтуға септігін тигізетінін атап өтті.

- Мен 21 наурызды көктем мен бауырластық мерекесі ретінде жариялау туралы ұсынысты парламентке енгізуге дайынмын, - деп мәлімдеді ол.

Түркия президенті бұл күнді Түрік мемлекеттері ұйымына мүше елдердің барлығы үшін ортақ етуді ұсынып, оны бірлесіп атап өтудің өзара қарым-қатынастарды одан сайын тереңдету үшін маңызды екенін атады.

- Меніңше, Наурыз мерекесін Түрік мемлекеттері ұйымы аясында бірлесіп атап өтетін уақыт жетті. Мамыр айында, Мажарстанда өтетін саммит барысында біз бұл мерекені түрік әлемі үшін ортақ күн ретінде атап өтуді ұсынамыз, -деді Ердоған.

Оның сөзінше, түрік интеграциясы мен бауырлас елдердің бір-біріне жақын бола түсуінің арқасында Наурыз Түркияда танымал бола бастады.

Осыған дейін Күрдістан жұмысшы партиясы Түркия үкіметімен бітімге келетінін жариялағаны туралы жаздық.